Surxondaryo viloyati Qiziriq tumanida yashovchi 23 yoshli ayol o‘zining bir yoshli qiz farzandini sotmoqchi bo‘lganida qo‘lga olindi. Bu haqda “Sevimli” telekanalining “Zamon” informatsion dasturida ma’lum qilindi.
Ma’lum qilinishicha, bolaning onasi jarqo‘rg‘onlik ayol bilan til biriktirib, shartli ismi o‘zgartirilgan Dilnozaga bir yoshli qizini sotmoqchi bo‘lgan. Biroq ushbu holat qonunga zid ekanligini bilgan Dilnoza huquqni himoya qilish organlariga murojaat qilgan.
IIB xodimlari tomonidan o‘tkazilgan tadbir davomida ayol o‘z farzandi uchun 12,6 million so‘m pulni olayotgan vaqtda qo‘lga olingan.
“Men bolamni sotmoqchi emasdim. Boqa olmaganim uchun berib yuborayotgandim. Sharoitim og‘ir, ota-onam ham bolamni qabul qilmayapti”, — deydi ayol.
Avvalroq Toshkentda 13 yoshli qizini 3,5 ming dollarga sotishga uringan ayol ushlangani, Buxoroda yangi tug‘ilgan chaqaloqni 8 mln so‘mga sotmoqchi bo‘lgan ona va bola qo‘lga olingani, Andijonda 3 oylik chaqalog‘ini 700 dollarga sotishga uringan ayol ushlangani to‘g‘risida xabar berilgandi.
Izoh (0)