Бухорода ўн минг доллар эвазига тўрт нафар фуқарони номдор компанияга ишга жойлаштиришни ваъда қилган бир гуруҳ шахслар қўлга олинди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, ҳолат вилоят Ички ишлар бошқармаси Жиноят қидирув бошқармаси ходимлари томонидан ўтказилган тезкор тадбирда аниқланган.Вобкент туманидаги «Кулончи» маҳалласида яшовчи 38 ёшли Ғ.С. Тошкент шаҳрида яшовчи 56 ёшли жиноий шериги М.Х. билан ҳеч қаерда ишламай, даромад топиш режасини тузган. Пухта ўйланган режалар асосида ўзларига таниш бўлган Қорақалпоғистон Республикаси, Қўнғирот туманида яшовчи С.М.нинг тўрт нафар қариндошини «Enter engineering» компаниясининг «Uz GTL» тармоғидаги мансабдор танишлари орқали ишга жойлаштириб қўйишни ваъда қилган. С.М. дан ҳар бир қариндоши учун 2500 доллардан, жами 10 000 доллар миқдоридаги пулларни пора тариқасида беришга ундаган.
Орадан вақт ўтишига қарамай, қариндошларининг ишга жойлашиши муаммо бўлаётган С.М. аввалдан ўзига таниш бўлган икки шахснинг хатти-ҳаракатларидан шубҳаланган ҳамда бу ҳақда вилоят ИИБга мурожаат қилишга мажбур бўлган. Зудлик билан Жиноят қидирув бошқармаси ходимлари томонидан тезкор тадбир уюштирилган. Ғ.С. ҳамда М.Х. келишилган пуллардан 90 миллион сўмни Бухоро шаҳрининг Ғиждувон кўчасидан ўтувчи йўл ёқасида пора тариқасида олаётган вақтда қўлга олинган. Ҳолат тегишли тартибда ҳужжатлаштирилган.
Мазкур ҳолат юзасидан Бухоро шаҳар Ички ишлар органлари фаолиятини мувофиқлаштириш бошқармаси ҳузуридаги Тергов бўлими томонидан Ғ.С. ва М.Х.ларга нисбатан Жиноят кодексининг 168-моддаси 2-қисми «б» банди (фирибгарлик) ва 28-модда (жиноят иштирокчиларининг турлари), 211-моддаси 2-қисми «б» (пора бериш) банди билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Изоҳ (0)