Фарғона вилоятининг Қўқон шаҳрида 2021 йил 7—10 июнь кунлари «TechnoWays» технологик ривожланиш марафони ўтказилди. Бу ҳақда марафонда қатнашган «Дарё» мухбири Азизжон Эрматов хабар берди.
Таъкидланишича, марафон ёшларни қийнаётган муаммоларнинг ечимини топиш, уларнинг инновацион, технологик, илмий билимларини ошириш ва стартап лойиҳаларини излаб топишда амалий кўмак кўрсатиш мақсадида ташкил этилган.
Қўқон университетида Инновацияларни жорий қилиш ва технологиялар трансфери миллий офиси билан ҳамкорликда ўтказилган марафонда Андижон, Фарғона ва Наманган вилоятларидаги олий таълим муассасаларининг профессор-ўқитувчилари, иқтидорли талабалари ва кўнгилли ёшлар қатнашган.
Марафон давомида иштирокчиларнинг инновацион, технологик, илмий, стартап лойиҳа ва ишланмалари саралаб олинган.
Технологик ривожланиш марафони доирасида тажрибали спикерлар томонидан маърузалар, тренинглар, маънавий-маърифий тадбирлар ўтказилган.
Шунингдек, ОТМларнинг профессор-ўқитувчилари, талабалар ҳамда ёшлар иштирокида ҳудудий инновацион ғоялар кўргазмаси бўлиб ўтган.
«TechnoWays» технологик ривожланиш марафони доирасида ўтказилган велопойгада 200 нафарга яқин иштирокчи қаторида Қўқон шаҳар ҳокими, университет ректори ва сектор раҳбарлари ҳам 8 минг 500 метрлик масофани босиб ўтган.
Қайд этилишича, велопойгада Қўқон шаҳар ҳокими Маъруфжон Усмонов финиш чизиғини биринчи бўлиб кесиб ўтган.
Изоҳ (0)