Ўзбекистон Президенти Шавкат Мирзиёев Тожикистон президенти Эмомали Раҳмон ҳамроҳлигида «Қайроққум гиламлари» корхонасини бориб кўрди.
Бу фабрика 1957 йилда ишга туширилган. 2019 йилда модернизация қилиниб, Германия, Италия, Япония, Хитой ва бошқа давлатлардан олиб келинган ускуналар ўрнатилган. Корхонада бир йилда 3 миллион квадрат метр маҳсулот ишлаб чиқарилмоқда.
Қайроққум гиламлари Шарқ анъаналарини акс эттирувчи жозибадорлиги ва нақшлари билан машҳур. Юқори сифати туфайли турли халқаро мукофотларга сазовор бўлган.
Президент корхона маҳсулотларини кўздан кечирди.
Навбатдаги объект томон йўл олар экан, давлат раҳбарларининг кортежи Қайроққум сув омбори ёнида тўхтади. Президентлар сув омборини кўздан кечириб, суҳбатлашди.
Аввалроқ Эмомали Раҳмон Шавкат Мирзиёевни биринчи даражали «Зарринтож» ордени билан мукофотлагани, Душанбеда Ўзбекистон ва Тожикистон санъат усталари иштирокида концерт бўлиб ўтгани ҳамда Шавкат Мирзиёев Душанбедан Хўжандга келгани ҳақида хабар берилганди.
Изоҳ (0)