Prezident Shavkat Mirziyoyev Tojikistonga tashrifi davomida Dushanbe shahridagi “Do‘stiy” maydonida Ismoil Somoniy haykali poyiga gullar qo‘ydi.

Foto: Prezident matbuot xizmati

So‘ng “Ko‘hi Borbad” san’at saroyida O‘zbekiston va Tojikiston san’at ustalari ishtirokida konsert bo‘lib o‘tdi.

Tadbirda Tojikiston prezidentining O‘zbekiston Prezidenti Shavkat Mirziyoyevni ikki mamlakat o‘rtasidagi hamkorlikni rivojlantirish yo‘lidagi ulkan xizmatlari uchun Tojikistonning yuksak mukofoti – I darajali “Zarrintoj” ordeni bilan mukofotlash to‘g‘risidagi farmoni o‘qib eshittirildi. Ordenni Shavkat Mirziyoyevga Tojikiston prezidenti Emomali Rahmon tantanali ravishda topshirdi.

Foto: Prezident matbuot xizmati

Davlat rahbari yuksak e’tibori uchun minnatdorlik bildirib, ushbu mukofot katta hurmat va ishonch ifodasi, xalqlar o‘rtasidagi yaxshi qo‘shnichilik rishtalarini mustahkamlash borasidagi birgalikdagi sa’y-harakatlar e’tirofi ekanini ta’kidladi.

Mamlakatlar yaqin qo‘shni, xalqlarning muqaddas yeriyu suvi, dini bir, tarixi va taqdiri, tashvish-u shodliklari mushtarak ekani qayd etildi.

Foto: Prezident matbuot xizmati

“Bir-birimizni qo‘llab-quvvatlab, o‘zaro manfaatli hamkorligimizni rivojlantirib, katta maqsadlarimizga erisha olamiz. Biz doim bir-birimizga tayanch bo‘lishimiz, har qanday qiyinchilik va sinovlarni yelkama-yelka yengib o‘tishimiz lozim.

Keyingi yillarda ikki tomonlama munosabatlarda ulkan o‘zgarishlar ro‘y berib, ularni O‘zbekiston va Tojikistondagi millionlab odamlar o‘z kundalik hayotida his etmoqda.

Bu O‘zbekiston—Tojikiston munosabatlarining yangi modeli, yangi muhitida o‘z aksini topmoqda. Eng muhimi, barcha sa’y-harakatlarimiz va amaliy ishlarimiz xalqlarimiz manfaatlari va orzu-intilishlariga to‘liq mosdir”, — dedi Shavkat Mirziyoyev.

Foto: Prezident matbuot xizmati

Shavkat Mirziyoyev ikki mamlakat san’at ustalarining bunday konsertlari xalqlar o‘rtasidagi abadiy va samimiy do‘stlikni ifodalovchi yaxshi an’anaga aylangani, san’at xalqlarni yaqinlashtirishda muhim o‘rin tutishini ta’kidladi.

“Insonga turli chegaralar o‘rnatish xos bo‘lsa, san’at chegara bilmaydi, uning buyuk vazifasi — odamlarni birlashtirish. Mehr-oqibatli bo‘lish, tinch-totuv yashash — xalqlarimizning azaliy orzusi va samimiy intilishidir. Biz ham, ikki davlat rahbarlari — o‘rtamizdagi chegaralar bizni ajratishga emas, faqat birlashtirishiga xizmat qilishi uchun bundan buyon ham harakat qilamiz.

Tinchlik va osoyishtalikni asrash, kelajak avlodlar uchun mamlakatlarimizning barqaror va izchil taraqqiyotini ta’minlash — umumiy burchimiz”, — dedi O‘zbekiston Prezidenti.

Foto: Prezident matbuot xizmati

Konsert dasturida iste’dodli san’atkorlar xalqlar madaniyatining boyligi, o‘ziga xosligi va shu bilan birga mushtarakligini namoyish etdi.

Foto: Prezident matbuot xizmati

Prezident Shavkat Mirziyoyevning Tojikistonga rasmiy tashrifi davom etmoqda.