O‘zbekiston Prezidenti Shavkat Mirziyoyev Tojikistonga rasmiy tashrifi doirasida 11-iyun kuni Dushanbedan Xo‘jandga keldi.

Foto: Prezident matbuot xizmati

Prezident matbuot xizmatining xabar berishicha, davlat rahbarini Tojikiston prezidenti Emomali Rahmon kutib oldi.

“Xo‘jandda davlatimiz rahbari tashrifiga katta tayyorgarlik ko‘rilgan. Ikki mamlakat bayroqlari bilan bezatilgan aeroport va ko‘chalarda jamoatchilik vakillari Prezidentimizni katta xursandchilik bilan kutib oldi”, — deb ta’kidlangan xabarda.

Foto: Prezident matbuot xizmati

Foto: Prezident matbuot xizmati

Shundan so‘ng ikki mamlakat yetakchilari qisqa uchrashuv o‘tkazib, birgalikda Xo‘jand yaqinidagi “Arbob” madaniyat saroyiga yo‘l oldi.

Eslatib o‘tamiz, Shavkat Mirziyoyev Tojikiston prezidenti Emomali Rahmonning taklifiga binoan 10-iyun kuni rasmiy tashrif bilan Tojikistonga keldi. Tashrifning ilk kunida davlat rahbari Dushanbe xalqaro aeroportida tantanali kutib olindi, “Qasri Millat” qarorgohida uyushtirilgan tantanali marosimda qatnashdi. Shu yerning o‘zida ikki davlat rahbarlari avvaliga tor, so‘ng kengaytirilgan tarkibdagi uchrashuvlarda ishtirok etdi.

Bundan tashqari, Samarqand va Xatlon viloyatlarida qurilgan ijtimoiy obyektlarning ochilish marosimi o‘tkazildi.

Tadbirlar yakunida O‘zbekiston va Tojikiston o‘rtasida 35 ta hujjat imzolandi. Emomali Rahmon Shavkat Mirziyoyevni birinchi darajali “Zarrintoj” ordeni bilan mukofotladi.