Навоий вилояти Навбаҳор туманида аҳоли вакиллари Қалқонота қишлоғи марказидан ўтувчи йўлни тўсишга уринди, дея хабар бермоқда Ички ишлар вазирлиги.
Қайд этилишича, 2021 йилнинг 10 июнь куни Навоий вилояти Навбаҳор туманида фуқаролар томонидан ҳудуднинг Қалқонота қишлоғи марказидан ўтувчи йўл фуқаролар томонидан ёпишга уриниб, ўз норозилик ҳаракатларида қатнашган.
Таъкидланишича, йўлда кўплар фуқаролар томонидан амалга оширилган «мантиқсиз ҳаракат» туманнинг «Ҳаловаттепа» маҳалласида яшовчи фуқаро С.Й. ва М.А.нинг ноқонуний хатти-ҳаракати билан боғлиқ.
Хусусан, мазкур икки фуқаро ҳеч қандай қонуний асосларсиз кўп маҳаллий аҳолининг ишончига кириш орқали уларга тегишли қора моллар ҳамда турли кўринишдаги моддий қийматликларни қиммат нархда олиб, уларга икки уч ой ичида маълум миқдорда кўпайтириб беришни ваъда қилади.
Олинган моддий бойликлар ва чорва молларини эса ярим нархида бошқа фуқароларга пуллаб, фирибгарлик жиноятини содир этади.
Мазкур ҳаракат ҳуқуқни муҳофаза қилувчи органлар томонидан атрофлича ўрганилиб, гумонланувчиларнинг хатти-ҳаракатларида жиноят аломатлари борлиги аниқланди.
Навбаҳор тумани ИИБ томонидан фуқаролар С.Й. ва М.А. хонадонларида белгиланган тартиб асосида тинтув ва суриштирув ишлари ўтказилди. Тўпланган маълумотлар асосида уларга нисбатан жиноий иш қўзғатилиб, эҳтиёт чораси сифатида қамоққа олинди.
Йўлни ёпишга ҳаракат қилиб, бошқа фуқароларни ҳам бунга даъват қилган шахслар ички ишлар ходимлари томонидан алоҳида назоратга олинди.
«Биздан чорва олган иккиси қамалганини эшитдик. Бир иккисидан телефон қилиб сўрадим, энди (қамоқдан) чиқса пул беради, чиқмаса бермайди, дейишди. Кейин халқ нима қилса тўғри қилаётгандир-да, деб қўшилдик. Афсусдаман қилган ишимдан. Қилган ишимдан уяляпман», – дейди намойишда қатнашган аёл.
Навбаҳор тумани Жиноят ишлари бўйича суди томонидан намойишда иштирок этганларнинг хатти-ҳаракатлари юзасидан суд жараёни ўтказилди. Хабарда намойишга чиққанлардан бири 7 суткага қамалгани маълум қилинган.
Аввалроқ Жиззахда юк ортиш талабларини бузган ҳайдовчилар норозилик билдириб, халқаро йўлни тўсиб қўйгани, Чироқчида ҳоким ваъдасини бажармагани учун «Афросиёб» поезд йўли тўсиб қўйилгани ҳамда Нукусда бир гуруҳ аёллар йўлни тўсиб қўйгани ҳақида хабар берилганди.
Изоҳ (0)