Самарқандда давлат органлари ходимлари шаънига нисбатан номақбул сўзларни айтгани тасвирланган видеони TikTok ижтимоий тармоғига жойлаштирган йигитлар жавобгарликка тортилди. Бу ҳақда вилояти ИИБ ахборот хизмати хабар берди.
Йигитларнинг қилган ишлари Жиноят ишлари бўйича Самарқанд шаҳар судида кўриб чиқилган. Суд қарорига кўра, А.Ш.га Маъмурий жавобгарлик тўғрисидаги кодекснинг 183-моддасига (майда безорилик) асосан 7 сутка маъмурий қамоқ жазоси тайинланган. Шунингдек, видеода кўриниш берган унинг яна бир шериги ва ҳолатни тасвирга олган учинчи йигит мос равишда 5 ва 4 суткага қамалган.
«‘Мент’ сўзини ишлатганмиз, аммо ўзимиз унинг маъносини билмаганмиз. Ички ишлар ходимлари ватанимиз учун қанчалик хизмат қилаётгани ҳақида хабарим бор. Қилган ишимдан чин кўнгилдан пушаймонман. Мени кечиришларини сўраб қолган бўлардим», – дейди тиктокер.
Аввалроқ Бухорода ички ишлар ходими кийимида «хурмача қилиқ» қилган тиктокерлар жавобгарликка тортилгани, Тошкентда ички ишлар ходими кийимини кийиб, машина капоти устида видеога тушган йигит ва унинг шериги 5 суткага, Сирдарёда эса ички ишлар ходими кийимида рақсга тушган йигит 8 суткага қамалгани тўғрисида хабар берилганди.
Изоҳ (0)