Сурхон давлат қўриқхонасида ўрнатилган фотоқопқон бир нечта ёввойи ҳайвонларни камера объектига муҳрлади. Бу ҳақда Давлат экология қўмитаси хабар қилди.
Ушбу суратларда каклик, морхўр ва унинг улоқчаларини кўриш мумкин.
Қайд этилишича, морхўр бутунлай йўқ бўлиб кетиш арафасида турган кенжа тур ҳисобланади.
У «Қизил китоб»га киритилган. Кўҳитанг, Бойсунтоғ, Боботоғ тоғ тизмаларида тарқалган. 1950–1970 йилларда кескин камайиб кетган. Кейинчалик Сурхон қўриқхонасида олиб борилган муҳофаза чоралари туфайли ушбу турнинг сони аста-секин кўпайиб бормоқда.
Сурхон давлат қўриқхонаси ходимлари томонидан ўтган йилги ўтказилган саноқда 565 та 2021 йилнинг май ойида ўтказилган саноқ натижасида 600 тадан ошгани аниқланган.
Бундан аввал Қашқадарёнинг Сечанкўлида ноқонуний балиқ овлаган шахслар табиатга 45 млн сўм зарар етказгани аниқлангани, Қорақалпоғистонда «Қизил китоб»га киритилган 11 бош жайронни овлаган шахслар аниқлангани ҳамда Қашқадарё чўлидан ўғирланган ноёб тошбақалар Бухоро ихтисослаштирилган «Жайрон» питомнигига юборилгани ҳақида хабар берилганди.
Изоҳ (0)