Назаримизда, ҳукумат табиат ўзгаришлари ортидан юзага келаётган муаммоларга жиддий қарашни бошлаши лозим. Айниқса, экология бўйича режа ҳамда дастурларини қайта кўриб чиқиши керак, деб ёзмоқда Telegram’даги «Давлетовуз» канали юритувчиси, блогер Қобил Хидиров.
Унинг сўзларига кўра, бир марталик тадбирлардан, кампаниябозликдан тийилган ҳолда кенг жамоатчилик иштирокида натижаси аниқ, барқарорлиги кафолатланган, иқтисодий асосли ва мувофиқлаштирилган саъй-ҳаракатларга қўл уриш вақти келди.
«Оддий мисол. Ҳар йили ҳашарларда миллионлаб дарахт экишларни тўхтатиш керак. ‘Тошкентнинг ҳар бир туманида 1 миллион дона кўчат экамиз’, деган ёлғон кампанияларга ҳам барҳам берилиши лозим. Чунки ўттиз йиллик тарихимизда ҳар ҳашар якунида эълон қилинган кўчатлар амалда экилганида ёки ўсганида, Ўзбекистон аллақачон ўрмонзорга айланиб кетган бўлар эди. Кўчатлар ва кўкаламзорлаштириш миллиардлаб маблағлар осон ўзлаштириладиган соҳага айлангани қолди, холос. Ҳар бир дарахт кўчати ўтқазилишидан тортиб, ўсиши, парвариши, суғорилиши кафолатлаган, жавобгарлиги аниқ бўлган тизим яратилмас экан, яхшиси, дарахт экилмагани маъқул. Ўзимизни ҳам, бошқаларни ҳам алдамай қўя қолайлик», — дейди блогер.
Унинг таъкидлашича, қурғоқчилик бундан буёғига чуқурлашса чуқурлашадики, мўъжиза юз бериш эҳтимоли жуда паст.«Шунинг учун ҳозирдан нафақат аҳоли пунктларига ичимлик суви трубаларини тортиш, балки сув захираларини яратиш, қайта ишлаш, муқобил технологияларни жорий этиш, қишлоқ хўжалиги ерларини муттасил оптималлаштириб бориш, аграр соҳада сувдан фойдаланишнинг тежамкор технологияларини амалда қўллаш, ҳозирдан ушбу масалаларга инвестицияларни кўпайтириш, ва энг муҳими, бу ишларнинг устидан жамоатчилик назоратини ўрнатиш зарур. Ҳаёт-мамот масаласини пул ўзлаштириш жараёнига айлантириб юборишдан ёмони йўқ. Чунки келажакда пахталаримиз тугул халқимизни ичимлик суви билан таъминлаш оғир вазифа бўлиб қолиши мумкин», — деб ёзмоқда «Давлетовуз» канали муаллифи.
Блогер табиат ўзгаришларига сиёсатчилар жиддий қарашлари лозимлигини, табиат ўзгаришлари аста-секин ижтимоий-сиёсий муаммоларни келтириб чиқаришини таъкидлади.
«Узоқ тарихда ҳам, яқин тарихда ҳам бунга мисоллар етарлича. Янги Ўзбекистон янги экологик реалликларни ҳам тан олиши лозим. Анча кечикдик, лекин яна кечикишнинг оқибатлари оғирроқ бўлиши мумкин. Ҳозирдан киришишимиз, киришганда ҳам, кампаниябозликдан тийилишимиз, дарров миллиард-миллиард долларлик гигант лойиҳаларга эмас, балки илмга, дунё тажрибасига асосланиб, босиқлик билан ишлашга ўтишимиз керак. ИМҲО, албатта», — дея ўз муносабатини одатдагидек якунлаган у.
Эслатиб ўтамиз, 2021 йилнинг бошларида Ўзбекистонда ноқонуний кесилган ҳар туп дарахт учун 100 туп кўчат экишни мажбурий этиш таклиф қилинганди. Тошкент шаҳар ҳокими Жаҳонгир Ортиқхўжаев пойтахтда 30 миллиард сўмга дарахт экишни таклиф қилганди.
Изоҳ (0)