Қашқадарё вилоятининг Деҳқонобод туманида «аёллар дафтари» ва «ёшлар дафтари»га киритилган 216 нафар фуқарога тикув машинаси топширилди. Бу ҳақда «Дарё»га туман ҳокимлиги ахборот хизмати хабар берди.
Таъкидланишича, тадбир очилишида сўз олган туман ҳокими Зоир Алиқулов аёллар ва ёшлар бандлигини таъминлаш мақсадида туманда кўплаб ишлар амалга оширилаётганини, жумладан, 216 нафар хотин-қиз ва ёшга тикув машинаси берилганини, бу эса уларнинг бандлигини таъминлаш учун восита бўлиб хизмат қилишини таъкидлаган.
«Ёшлигимда онамнинг тикиш қилишини синчиклаб кузатардим. Эски ва унчалик ҳам талабга жавоб бермайдиган машинкада қийналиб бўлса-да, кийим тикарди. Мен аниқ биламанки, сиз ҳам ёки сизнинг онангиз ҳам ана шундай эски тикув машиналарида бўлса-да, чиройли кийимлар тиккан ва айни кунда ҳам тикаётгандир. Биз сизга ишингиз осонлашиши учун янги тикув машинаси беришни мақсад қилдик. Бу мақсадимизга эришиш йўли ва имкониятини эса муҳтарам Президентимиз яратиб берган. Мақсадимиз — шу орқали сизнинг ишингизни осонлаштириш», — деди туман ҳокими.
Тадбирда, шунингдек, пазандачилик билан шуғулланиб келаётган 100 нафар аёлга субсидия асосида электр печ ҳам совға қилинган.
Мавзуга доир:
- Ўзбекистонда «аёллар дафтари» ва «темир дафтар»га кирган оилаларнинг фарзандлари бепул операция қилинади
- Ўзбекистонда «аёллар дафтари»га киритилган ёлғиз аёлларнинг фарзандлари ҳам боғчага имтиёзли рўйхат асосида қабул қилинади
- Ўзбекистондаги эҳтиёжманд оилаларнинг ёшлари «Ватанпарвар» автомактабларида бепул ўқишлари мумкин бўлади
Изоҳ (0)