Тошкент вилояти ИИББ 6 июнь куни ижтимоий тармоқларда «Чорвоқда фуқаролар ўртасида жанжал, оммавий муштлашув» каби изоҳлар билан тарқалган видео юзасидан суриштирув ўтказди.
Маълум қилинишича, мазкур ҳодиса тасвирга туширилган жой Бўстонлиқ тумани «Новобод» МФЙ ҳудудидаги Пирамида—Чорбоғ оромғоҳи соҳили бўлиб, соҳилда дам олиш 3 июнь кунидан расмий очилган. Шу вақт оралиғида бу каби ҳодиса рўй бермаган ва ИИОга ҳеч қандай мурожаат келиб тушмаган.
Аниқланишича, тасвирга олинган ҳолат 2018—2019 йил оралиғида содир бўлган бўлиши мумкин. Ҳозирда ушбу соҳилнинг суви, кўриниши ҳамда унинг атрофидаги муҳит ва бошқа жараёнлар ўзгаргани бунга сабаб қилиб кўрсатилган.
Ҳозирда мазкур ҳолатнинг келиб чиқиш сабаби ва ҳолат иштирокчиларини аниқлаш юзасидан Бўстонлиқ тумани ИИБ томонидан тезкор суриштирув ишлари олиб борилмоқда.
Аввалроқ Бухоро шаҳар ҳокимлиги биноси яқинида оммавий муштлашув бўлиб ўтгани ва ИИБ воқеага муносабат билдиргани, Чирчиқда 5 ёшли бола 2 ёшли болани йиқитиб юборгани учун болаларнинг оналари ва бувилари ўзаро жанжаллашгани, Термиздаги ресторанда ифторлик пайтида бир гуруҳ шахслар муштлашгани тўғрисида хабар берилганди.
Изоҳ (0)