Тожикистон ва Қирғизистон давлат хавфсизлик қўмиталари раҳбарлари чегарадан қўшинларни олиб кетишга келишиб олди

Қирғизистон ва Тожикистон чегарасидаги масала ижобий ҳал қилинди, эвакуация қилинган қирғизистонликлар қишлоқларига қайтарилади. Бу ҳақда Қирғизистон Миллий хавфсизлик давлат қўмитаси раҳбари Қамчибек Ташиев журналистларга маълум қилди, деб ёзади Tengrinews.

Ташиевнинг сўзларига кўра, Тожикистон билан 4 июнь куни ўтказилган музокаралар натижа бермаган, шу сабабли Қирғизистон расмийлари Ўш вилоятининг Чон-Олай туманидаги бир нечта қишлоқ аҳолисини хавфсиз зоналарга кўчиришга қарор қилган.

«4 июнь куни биз Тожикистоннинг чегара масалалари бўйича давлат комиссияси раҳбари генерал-полковник Сайимумин Ятимов билан музокаралар олиб бордик. Ўша кунги музокаралар натижа бермади, шунинг учун биз аҳолини эвакуация қилишга мажбур бўлдик. 5 июнь кунидаги йиғилиш Бишкек вақти билан соат 13:00 да якунланди. Масала ижобий ҳал қилинди деб айта оламан. Биргаликда биз 7—8 банддан иборат протоколни қабул қилдик. Икки соат ичида уларни нашр қиламиз», — деди Қамчибек Ташиев.

У Қирғизистон қўшинларини олиб чиқиб кетиш, шунингдек, эвакуация қилинганларни уйларига қайтариш тўғрисида буйруқ берилишини қўшимча қилди. «Биз эришилган келишувларни бузмадик ва биргаликда қабул қилинган шартномалар доирасида иш олиб борамиз», — дея хулоса қилди Қирғизистон Миллий хавфсизлик давлат қўмитаси раҳбари.

Asia-Plus ҳам 5 июнь куни Қирғизистон ва Тожикистоннинг давлат чегарасини делимитация ва демаркация қилиш бўйича томонлар давлат комиссиясининг ишчи йиғилиши бўлиб ўтганини хабар қилди.

Нашр хабарига кўра, томонлар қуйидагилар тўғрисида протокол имзолаган:

• ҳар икки томонда чегара постларини 3 км ичкарироққа киритиш;
• қўшинларни, ҳарбий техникани доимий жойлашган жойларига олиб чиқиш, фақат доимий чегара отрядларини қолдириш;
• ушбу ҳудуддаги яйловлардан фойдаланиш тўғрисида қарор қабул қилинди;
• давлат чегарасидаги ҳар қандай ҳаракатлар олдиндан томонларнинг ҳамраислари билан келишилган ҳолда амалга оширилиши керак;
• томонларнинг чегара қўриқчилари хулқ-атвор қоидаларига риоя қилиши лозим;
• оммавий ахборот воситаларида аввал имзоланган протоколларда қабул қилинган қарорларга мувофиқ, фақат иккала томон келишган маълумотларни тарқатиш;
• топографик ишчи гуруҳлар раҳбарларига қисқа вақт ичида ПТ № 12 2 дан ПТ № 12 9 гача бўлган Қирғизистон ва Тожикистон давлат чегарасининг участкаларини тавсифлашни якунлаш бўйича кўрсатма берилди;
• томонларга чегарадош қишлоқлар аҳолиси билан тушунтириш ишларини олиб бориш топширилди.

Эслатиб ўтамиз, 4 июнь куни эрталаб Қирғизистон матбуоти Тожикистонни келишувларни бузганликда ва чегаранинг тавсифланмаган қисмида контейнер ўрнатганликда айблаган эди.

Тожикистон чегара қўшинлари тожик—қирғиз чегарасида чегара патрулини намойиш қилишни қонунбузарлик деб ҳисобламаслигини ҳамда Қирғизистон билан тузилган келишувнинг бузилиши ҳақидаги хабарлар ҳақиқатга тўғри келмаслигини айтган.

Уларнинг таъкидлашича, протокол келишувига биноан, «чегара патрули келишилган ҳудудда ва тенг ҳуқуқлилик тамойили асосида намойиш этилган».

Кейинчалик томонлар ўзаро нота алмашди: Тожикистон Ташқи ишлар вазирлиги Қирғизистоннинг Тожикистондаги элчисига, Қирғизистон Ташқи ишлар вазирлиги ҳам мамлакатдаги Тожикистон элчисига нота топширди.