Беларусь президенти Александр Лукашенко, зарурат бўлса, республикада иккинчи атом электр станцияси (АЭС) қурилишини истисно этмаяпти, деб ёзади «Интерфакс».
«Керак бўлса, иккинчи атом электр станциясини қурамиз. Бунинг истиқболи баланд», — деди у энергетика бўлимлари раҳбарлари билан учрашувда.
Президент фикрига кўра, БелАЭСдан олинадиган электр энергияси талабгир бўлади. «Агар биз оқилона ривожланиш касб этсак, у ҳолда бу электр энергияси ҳам камлик қилади. Бу жуда тоза энергия манбаси, у ҳамма жойда ва ҳамма соҳада керак: уй-жой ва саноатдан тортиб то АЭСнинг ўзигача», — деди у.
2 июнь куни Беларусь Фавқулодда вазиятлар вазирлигининг коллегияси БелАЭС лицензиясига ўзгартириш киритишга қарор қилди ва биринчи энергия блокидан тижорий мақсадларда фойдаланиш ҳуқуқини берди.
Май ойида БелАЭС биринчи энергия блокининг 2020 йил 22 декабрдан бошлаб амалга оширилиб келган тажриба-саноат эксплуатацияси босқичи якунланди. Станциянинг биринчи энергия блокини жисмоний ишга тушириш 2020 йил август ойида бўлиб ўтган эди, унинг тижорий фаолиятини бошлаш 2021 йилнинг биринчи ярмига режалаштирилган.
Иккинчи энергия блокининг жисмоний ишга туширилиши 2021 йилнинг кузида, фойдаланишга топшириш эса — 2022 йилнинг биринчи ярмида кутилмоқда.
Икки энергия блоки тўлиқ ишга туширилгандан сўнг, БелАЭС йилига тахминан 18,5 миллиард киловатт/ соат электр ишлаб чиқариши мумкин, бу эса мамлакатда электр энергиясига бўлган эҳтиёжнинг тахминан 40 фоизини таъминлайди. Тажриба-саноат эксплуатацияси бошланганидан бери БелАЭСда электр энергияси ишлаб чиқариш 2,5 миллиард киловатт / соатдан ошди.
Эслатиб ўтамиз, БелАЭС 2020 йил 7 ноябрь куни Александр Лукашенко томонидан тантанали равишда очиб берилган. Очилиш маросимида Лукашенко Беларусь қудратли ядро давлатига айланишини маълум қилган.
9 ноябрь куни эса (баъзи манбаларда 8 ноябрь куни) АЭСнинг биринчи энергоблокида кучланиш трансформаторларининг ишдан чиқиши сабабли турбина тўхтатилгани ҳақида маълумот пайдо бўлди. Беларусь Энергетика вазирлигининг хабар беришича, атом электростанциясида «алоҳида электротехник ўлчов қурилмаларини алмаштириш зарурати аниқланган, мазкур қурилмани алмаштириш ишлари эса технологик регламентга асосан амалга оширилмоқда». 10 ноябрь куни Беларусь Давлат атом назорати хизмати алмаштирилиши керак бўлган электротехник ўлчов қурилмаси хавфсизликнинг 4-синфига тааллуқли экани ва объектнинг ядровий ва радиацион хавфсизлигига таъсир қилмаслиги ҳақида хабар берди
Изоҳ (0)