«Ўзбекнефтгаз» матбуот хизмати хабарига кўра, Талимаржон ИЭСда авариявий ҳолат юз бергани, шу сабаб «Ўзбекнефтгаз» корхоналари фаолияти вақтинча тўхтаб қолгани хабар берилган. «Иссиқлик электр станциялари» ахборот хизмати мазкур ҳолатни рад этди.
«Иссиқлик электр станциялари» ахборот хизматининг ёзишича, 4 июнь куни соат 22:17 да Талимаржон ИЭСдан 18,5 километр узоқликдаги «Ўзбекнефтгаз» тизимидаги «Шўртан» подстанциясидан чиқувчи 220 кВли электр узатиш тармоғида узоқ муддатли (4,7 секунд) қисқа туташув юзага келган. Шу сабаб 220 кВ кучланишли тармоқ кучланиши 35 кВгача камайиб, Толимаржон ИЭСнинг 1-сонли энергоблоки ҳамда 2-сонли буғ-газ қурилмасининг автоматик ҳимоя тизими муваффақиятли ишга тушган.
« ‘Шўртан’ подстанциясидан чиқувчи 220 кВли электр узатиш линиясида қисқа туташув содир бўлишига авто-техникаларнинг 220 кВли электр узатиш тармоғига рухсат этилмаган масофагача яқинлашиши оқибатида тармоқдан ерга узоқ муддатли қисқа туташув содир бўлган. Агар Талимаржон ИЭСдаги энергоблокларнинг автоматик ҳимоя тизими юз берган ушбу туташув натижасида энергоблокларни тўхтатмаганда, бу электр энергияси узатиш тизимида жуда катта миқдордаги техникавий ва молиявий талафотларга сабаб бўлиши мумкин эди», — дейилади расмий баёнотда.Таъкидланишича, воқеа юз берган вақтнинг ўзида тизим ишини тиклаш учун барча имкониятлар ишга солинган ва Талимаржон ИЭС 2-сонли буғ-газ қурилмаси 5 июнь соат 00:58 да ишга туширилган.
«Бугун соат 10:14 да станциядаги 1-сонли энергоблок қайтиб ишга қўйилди ва айни пайтда тўлиқ қувватда ишламоқда. Талимаржон ИЭС ишлаб чиқараётган электр энергиясининг ўрнини қоплаш учун Тошкент ИЭС, Навоий ИЭС ва Сирдарё ИЭСлардаги заҳирадаги энергоблоклар қўшимча қувватлар етказиб бериш учун энерготизимга уланди. Юқоридаги ҳолатни инобатга олиб ОАВ ва айрим ижтимоий тармоқ вакилларидан ‘Иссиқлик электр станциялари’ фаолиятига боғлиқ маълумотларни тарқатишда, ахборотларнинг ишончлилигини таъминлашда, хусусан жамоатчиликни чалғитишнинг олдини олиш мақсадида юз берган ҳолатлар бўйича «Иссиқлик электр станциялари» матбуот хизматига мурожаат қилишларини сўраймиз», — дейилади ‘Иссиқлик электр станциялари’ ахборот хизмати расмий сайтида.
Изоҳ (0)