Талимаржон ИЭС директори Олим Юсупов республика бўйлаб амалга оширилаётган электр чекловларига электр энергия етишмовчилиги сабаб бўлмаслигини, Талимаржон ИЭС ҳар доим сўралган электр энергияни ишлаб чиқаришини маълум қилди. Бу ҳақда журналист ва блогерлар учун ташкил этилган пресс-турда маълум қилинди, дея хабар берди «Дарё» мухбири.
Маълум бўлишича, «Иссиқлик электр станциялари» АЖ ахборот хизмати ташаббуси билан Талимаржон ИЭСда 2021 йилнинг 3—4 июнь кунлари журналист ва блогерлар учун пресс-тур ташкил этилган.
Пресс-тур аввалида ташкил этилган матбуот анжуманида «Дарё» мухбири масъулларга юзланиб, ўтган қиш мавсумида аҳолига электр энергиясини етказишда кўплаб узилишлар бўлганини, Қашқадарё вилояти маркази бўлмиш Қарши шаҳрида ҳам электр энергиядаги чекловлар олти соатгача давом этганини эслатиб, «Мазкур чекловлар сиз томонингиздан электр энергияси кам миқдорда ишлаб чиқарилганиданми, Толимаржон ИЭС мисолида оладиган бўлсак, аҳолига етарли даражада электр энергия ишлаб чиқариш имкониятига эгамисизлар?, — дея савол берди.
Мазкур саволга жавоб берган Талимаржон ИЭС директори Олим Юсупов ИЭСда жамиятдаги қувват 1700 МВт эканини таъкидлаб, «Бизда йиллик режа бор ва шу режага қараб сўралган электр энергияни ишлаб чиқарамиз. Чекловлар электр энергия етишмовчилиги сабаб юзага келмайди», — деди.
Олим Юсупов, шунингдек, электр энергия етказиб беришдаги чекловлар нима сабабдан қўлланилади деган саволга тўхталиб, « ‘Ҳудудий электр тармоқлари’ ҳамда ‘Миллий электр тармоқлари’ билан ҳамкорликда иш олиб борамиз, шу сабаб чекловни фалон ташкилот, фалон сабабга кўра амалга оширади дейиш фикридан йироқман, бу бизнинг ваколатимизга ҳам кирмайди. Бироқ яна бир бор такрорлаб айтаманки, биз ҳар йили сўралган электр энергияни ишлаб чиқариб, ўзимизга юклатилган вазифани уддалаймиз», — деди.
Тадбирда таъкидланишича, Талимаржон ИЭСда учта энергоблок мавжуд бўлиб, 800 МВтли энергоблок 2004 йил ноябрда ишга туширилган. 2 ва 3-сонли, ҳар бири 450 МВтли буғ-газ қурилмалари 2017 йилда тўлиқ қувватларда электр энергия ишлаб чиқаришни бошлаган.
Олим Юсуповнинг қўшимча маълумот беришича, АЖда йилига 7,2 миллиард киловатт электр энергия ишлаб чиқариш имконияти мавжуд бўлиб, истеъмолчилар талабига кўра 11,4 миллиард киловатт соат электр энергия етказиб берилмоқда.
Изоҳ (0)