Talimarjon IES direktori elektr energiyadagi cheklovlarga yetishmovchilik sabab bo‘lmasligini ma’lum qildi

Talimarjon IES direktori Olim Yusupov respublika bo‘ylab amalga oshirilayotgan elektr cheklovlariga elektr energiya yetishmovchiligi sabab bo‘lmasligini, Talimarjon IES har doim so‘ralgan elektr energiyani ishlab chiqarishini ma’lum qildi. Bu haqda jurnalist va blogerlar uchun tashkil etilgan press-turda ma’lum qilindi, deya xabar berdi “Daryo” muxbiri.

Ma’lum bo‘lishicha, “Issiqlik elektr stansiyalari” AJ axborot xizmati tashabbusi bilan Talimarjon IESda 2021-yilning 3—4-iyun kunlari jurnalist va blogerlar uchun press-tur tashkil etilgan.

Press-tur avvalida tashkil etilgan matbuot anjumanida “Daryo” muxbiri mas’ullarga yuzlanib, o‘tgan qish mavsumida aholiga elektr energiyasini yetkazishda ko‘plab uzilishlar bo‘lganini, Qashqadaryo viloyati markazi bo‘lmish Qarshi shahrida ham elektr energiyadagi cheklovlar olti soatgacha davom etganini eslatib, “Mazkur cheklovlar siz tomoningizdan elektr energiyasi kam miqdorda ishlab chiqarilganidanmi, Tolimarjon IES misolida oladigan bo‘lsak, aholiga yetarli darajada elektr energiya ishlab chiqarish imkoniyatiga egamisizlar?, — deya savol berdi.

Mazkur savolga javob bergan Talimarjon IES direktori Olim Yusupov IESda jamiyatdagi quvvat 1700 MVt ekanini ta’kidlab, “Bizda yillik reja bor va shu rejaga qarab so‘ralgan elektr energiyani ishlab chiqaramiz. Cheklovlar elektr energiya yetishmovchiligi sabab yuzaga kelmaydi”, — dedi.

Olim Yusupov, shuningdek, elektr energiya yetkazib berishdagi cheklovlar nima sababdan qo‘llaniladi degan savolga to‘xtalib, “ ‘Hududiy elektr tarmoqlari’ hamda ‘Milliy elektr tarmoqlari’ bilan hamkorlikda ish olib boramiz, shu sabab cheklovni falon tashkilot, falon sababga ko‘ra amalga oshiradi deyish fikridan yiroqman, bu bizning vakolatimizga ham kirmaydi. Biroq yana bir bor takrorlab aytamanki, biz har yili so‘ralgan elektr energiyani ishlab chiqarib, o‘zimizga yuklatilgan vazifani uddalaymiz”, — dedi.

Tadbirda ta’kidlanishicha, Talimarjon IESda uchta energoblok mavjud bo‘lib, 800 MVtli energoblok 2004-yil noyabrda ishga tushirilgan. 2 va 3-sonli, har biri 450 MVtli bug‘-gaz qurilmalari 2017-yilda to‘liq quvvatlarda elektr energiya ishlab chiqarishni boshlagan.

Olim Yusupovning qo‘shimcha ma’lumot berishicha, AJda yiliga 7,2 milliard kilovatt elektr energiya ishlab chiqarish imkoniyati mavjud bo‘lib, iste’molchilar talabiga ko‘ra 11,4 milliard kilovatt soat elektr energiya yetkazib berilmoqda.