Англиянинг London ICE биржасида бир баррель Brent нефтининг нархи 72 доллардан ошди. Бу 2019 йилнинг май ойидан буён кузатилган энг юқори кўрсаткич ҳисобланади, деб ёзмоқда «Коммерсантъ».
2021 йилнинг 4 июнь ҳолатига кўра, Brent 72,01 долларга сотилди. Нефтьнинг бир баррель учун нарх аввалги савдоларнинг ёпилишига қадар деярли 1 фоизга ўсди. WТI нефтининг нархи эса 0,8 фоизга қимматлашиб, 69,6 долларга сотила бошлади.
Аввалроқ Bloomberg коронавирус пандемияси келтириб чиқарган инқироз оқибатида тўпланган ортиқча нефть захиралари деярли тугаб бўлгани ҳақида ёзган эди. Халқаро энергетика агентлигининг (ХЭА) маълумот беришича, февраль ойи ҳолатига кўра, омборларда тўпланган ёқилғи миқдори 20 фоиздан ҳам камроқ қолган эди. Ўшандан буён мавжуд ёқилғи ҳажми янада қисқарди, деб таъкидлади Bloomberg.
Шунингдек, Хитой 25 йил давомида барқарор нефть таъминоти эвазига Эрон иқтисодиётига 400 миллиард доллар инвестиция киритишга рози бўлгани ҳақида хабар берилганди. Венесуэла президенти Николас Мадуро эса коронавирусга қарши вакцина учун нефть билан ҳақ тўлашни таклиф қилганди.
Изоҳ (0)