YouTube’dagi Gotcha Cars kanalida beshinchi avlod Kia Sportage’ning kompaniya tomonidan e’lon qilingan rasmiy tizerlar hamda real avtomobilning josuslik suratlari asosida yaratilgan sifatli renderlari e’lon qilindi, deb xabar beradi IXBT.
Gotcha Cars kanali yangi va eski avlod Kia Sportage’larni o‘zaro taqqoslagan, shuningdek, avtomobil Hyundai Tucson, Volkswagen Tiguan va Nissan Qashqai oldida qanday ko‘rinishini namoyish etgan.
Yangi Kia Sportage’ning tashqi ko‘rinishi rostdan ham noyob — bunga hech qanday shubha yo‘q. Ammo yangi ixcham krossoverning texnik jihati Hyundai Tucson’ga juda o‘xshash.
Avvalroq yangi Kia Sportage krossoveri Yevropada biroz kechikish bilan sotuvga chiqishi va AQSh hamda Janubiy Koreya bozorlari uchun mo‘ljallangan versiyalardan kaltaroq bo‘lishi ma’lum qilingandi. Bu borada ham yangi model Hyundai Tucson’ga o‘xshab ketadi.
Taxminlarga ko‘ra, yangi Sportage bozor sharoitidan kelib chiqib, turli dvigatellarga ega bo‘ladi. Yevropada 1,6 va 2 litrli dizel dvigatelga ega versiyalari, shuningdek, 1,6 litrli benzinda harakatlanuvchi gibrid versiyalar sotuvga chiqadi.
Beshinchi avlod Kia Sportage Janubiy Koreya va AQShda iyul oyida, Yevropada esa sentabrda sotuvga chiqishi kutilmoqda. Hozirga qadar Sportage dunyoda eng ko‘p sotilgan krossover va Kia’ning eng mashhur avtomobili bo‘lib qolmoqda.
Avvalroq Kia birinchi bor o‘zining yangi elektrokari tizerini namoyish etgani, kompaniya o‘zining logotipi va shiorini o‘zgartirgani to‘g‘risida xabar berilgandi.
Izoh (0)