«Ўзгидромет» сўнгги вақтларда Ўзбекистонда кўп кузатилаётган қум ва чанг бўронлари пайдо бўлиши сабабларини келтирди.
Чангли бўрон – бу атмосфера ҳодисаси бўлиб, ер юзидан катта миқдордаги қум ва чангларнинг кучли шамол таъсирида кўтарилишидир. Бизнинг ҳудудимизда бундай жараёнлар кўпинча баҳорда ва ёзнинг бошида ривожланади.Эслатиб ўтамиз, Тошкент шаҳрида 29 май куни соат 21:00 атрофида бошланиб, тахминан, бир соатдан ортиқ давом этган кучли шамол чанг бўронларини келтириб чиқарганди. Шу куни чанг бўрони сабаб Бухородан келаётган чартер рейс Тошкентга қўна олмаган. Шунингдек, 1 июнь куни Қарши—Самарқанд йўлида қум бўрони, 31 май куни Наманганда, 2 июнь куни Бухорода кучли шамол ва чанг бўронлари кузатилган.Ўзбекистон, шунингдек, Марказий Осиёнинг барча ҳудудлари учун чангли бўрон жуда тез-тез учрайдиган ҳодисадир. Кўпинча бундай ҳодисалар қурғоқчил ҳудудларда — чўл ва ярим чўл ҳудудларда содир бўлади.
2021 йилнинг май ойида Ўзбекистон ҳудуди бўйича бир нечта чангли бўрон ҳодисалари кузатилди. Ҳатто Тошкентда ҳам 29 май куни шиддатли кучли шамол ҳисобига чангли бўрон кузатилди.
Тошкент қурғоқчил ҳудуд деб ҳисобланмайди, лекин сўнгги йилларда Ўзбекистонда ва Тошкент шаҳрида жадал суръатлар билан олиб борилаётган қурилишлар жуда катта миқдордаги қум ва чангнинг пайдо бўлишига сабаб бўлмоқда, улар ҳатто кучсиз шамол эсганда ҳам ҳавога кўтарилади.
Қўшработ метеостанциясида соат тахминан 15:18 ларда шимоли-ғарбдан кучли шамол бошланиб, 20 метр/сониягача етган, шунинг оқибатида қумли бўрон кўтарилган ва тахминан 16:20 ларда тинган.
«Ўзгидромет» матбуот хизмати
Изоҳ (0)