Тошкент ерусти метросининг ҳалқа йўли қурилиши давомида дуч келинган дарахтлар бошқа ерга кўчирилади. Бу ҳақда АОКАда ўтказилган брифингда Экология ва атроф-муҳитни муҳофаза қилиш давлат қўмитаси ахборот хизмати раҳбари Озод Ражабов маълум қилди.
«Ерусти ҳалқа метро линияси қурилиши майдонида қайсидир дарахт ёки бутани кўчиришга тўғри келади. Яна бир томони — ҳамма дарахтларни ҳам кўчириб бўлмайди.
Сергели—Қўйлиқ йўналишида метро қурилишида ана шундай ҳолат юзага келганда қандай тартиб амал қилиши Ўзбекистон Президентининг 2021 йил 23 апрелда Тошкент шаҳрида барпо этилаётган замонавий корхоналар фаолияти, шунингдек, маҳаллаларда олиб борилаётган бунёдкорлик ва ободонлаштириш ишлари билан танишиш жараёнида берган топшириқлари баёнида кўрсатиб ўтилган.
Унга мувофиқ, мазкур ҳудудда жойлашган ўрмон фондига кирмайдиган дарахт ва буталарни кўчиришга, кўчириш имкони бўлмаганда, истисно тариқасида кесишга рухсат берилган.
Бунда, мораторий талабларидан келиб чиқиб, кесиладиган ҳар бир дарахт учун компенсация сифатида 10 туп қимматлиги жиҳатидан кесиладиган дарахт ва буталардан кам бўлмаган кўчатларни экиш ва уларни икки йил давомида парваришлаш мажбурияти юклатилади.
Шу муносабат билан Давлат экология қўмитаси Тошкент шаҳар бошқармаси мутасаддилари соҳа мутахассислари ва эколог-инспекторларни жалб қилган ҳолда қурилиш режалаштирилган катта ҳудуддаги дарахтларни тўлиқ инвентаризациядан ўтказди.
Унга кўра, ерусти метросининг Миробод туманидан ўтадиган қисмида 66 та, Сергели туманидан ўтадиган қисмида 168 та, Янгиҳаёт туманидан ўтадиган қисмида эса 551 та (жами 785 та) дарахт борлиги аниқланди. Буларнинг орасида сафора, терак, арча, тут, ёнғоқ, ўрик, эман, шумтол, қайрағоч, чинор сингари дарахтлар бор.
Уларни қаерга кўчириш маҳаллий туман ҳокимликлари билан, қандай кўчириш эса биолог олимлар билан маслаҳатлашилмоқда. Мақсад битта — имкон қадар барчасини сақлаб қолишдан иборат.
Яна табиий савол туғилиши мумкин: барибир бир неча дарахтни кесишга тўғри келганда — ушбу ёғоч хом ашёсидан ким қандай фойдаланади? Бу савол ҳам экологлар томонидан қурилиш ташкилотлари ва ҳокимликлар олдига қўйилган. Масаланинг ечими сифатида эса аввал дарахтни Ободонлаштириш бошқармаси балансига ўтказиш ва шундан кейин ёғочни ё ҳунармандларга тақдим этиш, ёки бошқарманинг зарурий эҳтиёжлари учун ишлатиш режалаштирилмоқда», — дейди Озод Ражабов.
Бундан аввал Сурхондарё ҳокимлиги Бутунжаҳон биохилма-хилликни асраш куни арчалар оммавий кесилганига муносабат билдиргани, Қарши шаҳар ҳокимлиги томонидан 47 туп дарахт кесиб ташлангани аниқлангани ҳамда Қаршидаги истироҳат боғида дарахтларни кесган Ободонлаштириш бошқармаси ходимлари огоҳлантиришга қарамай яна дарахт кесгани аниқлангани ҳақида хабар берилганди.
Изоҳ (0)