Дунёдаги энг катта дирижаблга 100 нафар йўловчига мўлжалланган ўриндиқ ўрнатиш режалаштирилмоқда, деб хабар беради Hi-Tech.Mail.ru.
Узунлиги ўртача тижорий самолётдан икки баробар катта бўлган Airlander 10 авиакомпанияларнинг кўплаб йўловчилар кўникиб қолган парвоздан кўра кўпроқ қулайликни тақдим этади.
Ёрқин концептуал тасвирларда юмшоқ ёстиқчаларга эга қулай ўриндиқлар намойиш этилган. Ҳашаматли дирижаблнинг асосий безаги — полдан шифтга қадар тортилган шаффоф ойна. Йўловчилар бунинг ёрдамида атрофни бемалол томоша қилиши мумкин бўлади.
Улкан дирижабль йўловчилар билан бирга ўзининг илк парвозини 2025 йилдан амалга ошириши мумкин. Airlander’нинг синов парвозларидан бири 2016 йилнинг августида амалга оширилган эди. 2018 йилда эса синов парвозлари давомида дирижабль фалокатга учраганди.
Режаларга кўра, Airlander 10 дирижаблларидан йилига 12 нусха яратилади. Бироқ улар фақатгина Буюк Британия ва АҚШ шаҳарлари ўртасида уча олади.
Маълумот учун, Airlander 10 дирижабли Британиянинг Hybrid Air Vehicleс компанияси томонидан қурилган. Лойиҳа устидаги ишлар 2010 йилда бошланган бўлиб, ўшанда дирижаблдан ҳарбий соҳада фойдаланиш режалаштирилган. Бироқ лойиҳа нархининг жуда қимматлиги бунга тўсқинлик қилгани сабаб, ундан фуқаролик мақсадларида фойдаланишга қарор қилинган.
Жаҳон ОАВлари Airlander 10’нинг дунёдаги энг катта учиш аппарати деб атамоқда. Унинг узунлиги 92 метрни, эни — 43,5 метр, баландлиги эса 26 метрни ташкил этади, фойдали юклама массаси 10 минг килограммга тенг.
Изоҳ (0)