Шавкат Мирзиёев ҳудудлар иқтисодиёти, аҳоли турмуш шароитлари билан яқиндан танишиш мақсадида 1 июнь куни Сурхондарё вилоятига ташрифини Шеробод туманидан бошлаганди. Давлат раҳбари ташриф давомида Шеробод тумани «Бўстон» маҳалласида ташкил этилган анор боғини кўздан кечирди.
Президент матбуот хизматининг хабар беришича, давлат раҳбари иқтисодий комплекс олдига вазифа қўйиб, ҳар бир ҳудуднинг хусусиятларидан келиб чиқиб лойиҳа қилиш, «ўсиш нуқталари»ни топиб, ривожлантириш зарурлигини таъкидлади.
Маълум қилинишича, Сурхондарё вилоятининг шундай йўналишларидан бири — анорчилик. Айниқса, Шерободнинг анорлари катта, мазали, ҳосилдор бўлади. Туманда 48 та маҳалланинг 33 таси анор етиштиришга ихтисослашган. Шундай анорзорлардан бири «Сардорбек Султонбек» масъулияти чекланган жамияти томонидан туманнинг «Бўстон» маҳалласида ташкил этилган. Президент ушбу боғни кўздан кечирди.
43 гектар ерда 30 минг донадан зиёд анор экилган. Қозоқи навли ушбу анорнинг бир донаси 1 килограммдан зиёд тош босиши мумкин. Кўчатлар бу йилдан ҳосилга кирди. Йилига жами минг тоннадан зиёд маҳсулот олиш мўлжалланган. Шу ерда Тошкент давлат аграр университетининг Термиз филиали тадқиқотчилари билан мулоқот бўлди.
«Бизда анорчилик бўйича анъана бор, лекин илм йўқ, китоб йўқ, лаборатория йўқ. Анор жайдари усулда етиштириляпти. Касалликдан ҳимоя қилишни ҳамма ҳам билмайди. Энг катта нарса — нав керак. Кейин шу навни хонадонларга киргизиш зарур», — деган Шавкат Мирзиёев.
Президент Сурхондарёда қишлоқ хўжалигини инновацион йўналтириш бўйича институт ташкил этиш, анор билан бирга лимон, хурмо етиштиришни кўпайтириш юзасидан кўрсатмалар берди.
Давлат раҳбари туманнинг «Каттабоғ» маҳалласида анорчилик билан шуғулланаётган Абдураҳмон Каримов хонадонида ҳам бўлиб, аҳоли турмуши ва томорқалардан фойдаланиш ҳолати билан танишди. Маҳалла аҳли, нуронийлар билан ҳам суҳбат бўлди.Мавзуга доир: Видео: Комбайн ҳайдаётган Шавкат Мирзиёев
Изоҳ (0)