Shavkat Mirziyoyev: “Bizda anorchilik bo‘yicha an’ana bor, lekin ilm yo‘q, kitob yo‘q, laboratoriya yo‘q”

Shavkat Mirziyoyev hududlar iqtisodiyoti, aholi turmush sharoitlari bilan yaqindan tanishish maqsadida 1-iyun kuni Surxondaryo viloyatiga tashrifini Sherobod tumanidan boshlagandi. Davlat rahbari tashrif davomida Sherobod tumani “Bo‘ston” mahallasida tashkil etilgan anor bog‘ini ko‘zdan kechirdi.

Prezident matbuot xizmatining xabar berishicha, davlat rahbari iqtisodiy kompleks oldiga vazifa qo‘yib, har bir hududning xususiyatlaridan kelib chiqib loyiha qilish, “o‘sish nuqtalari”ni topib, rivojlantirish zarurligini ta’kidladi.

Ma’lum qilinishicha, Surxondaryo viloyatining shunday yo‘nalishlaridan biri — anorchilik. Ayniqsa, Sherobodning anorlari katta, mazali, hosildor bo‘ladi. Tumanda 48 ta mahallaning 33 tasi anor yetishtirishga ixtisoslashgan. Shunday anorzorlardan biri “Sardorbek Sultonbek” mas’uliyati cheklangan jamiyati tomonidan tumanning “Bo‘ston” mahallasida tashkil etilgan. Prezident ushbu bog‘ni ko‘zdan kechirdi.

43 gektar yerda 30 ming donadan ziyod anor ekilgan. Qozoqi navli ushbu anorning bir donasi 1 kilogrammdan ziyod tosh bosishi mumkin. Ko‘chatlar bu yildan hosilga kirdi. Yiliga jami ming tonnadan ziyod mahsulot olish mo‘ljallangan. Shu yerda Toshkent davlat agrar universitetining Termiz filiali tadqiqotchilari bilan muloqot bo‘ldi.

“Bizda anorchilik bo‘yicha an’ana bor, lekin ilm yo‘q, kitob yo‘q, laboratoriya yo‘q. Anor jaydari usulda yetishtirilyapti. Kasallikdan himoya qilishni hamma ham bilmaydi. Eng katta narsa — nav kerak. Keyin shu navni xonadonlarga kirgizish zarur”, — degan Shavkat Mirziyoyev.

Prezident Surxondaryoda qishloq xo‘jaligini innovatsion yo‘naltirish bo‘yicha institut tashkil etish, anor bilan birga limon, xurmo yetishtirishni ko‘paytirish yuzasidan ko‘rsatmalar berdi.

Davlat rahbari tumanning “Kattabog‘” mahallasida anorchilik bilan shug‘ullanayotgan Abdurahmon Karimov xonadonida ham bo‘lib, aholi turmushi va tomorqalardan foydalanish holati bilan tanishdi. Mahalla ahli, nuroniylar bilan ham suhbat bo‘ldi.