31 май куни ижтимоий тармоқлардаги расмий доираларга алоқадор манбаларда UzAuto Motors автомобилларини сотиб олиш учун «шапка» тизими қайта тиклангани ҳақида хабарлар пайдо бўлди (аслида одамлар орасида бу каби гап-сўзлар Асакадаги автозавод фаолиятида 2021 йил февраль ойида кузатилган салкам бир ойлик танаффусдан сўнг, автомобилларни етказиб бериш ўртача 1—2 ойга кечикиши маълум қилинганидан кейин пайдо бўлган эди).
UzAuto Motors бу каби гап-сўзларга муносабат билдираркан, автомобиль ишлаб чиқаришнинг кескин пасайиб кетиши ортидан юзага келган тақчилликдан «баъзи бир виждонсиз субъектлар» фойдаланишга уриниб, «спекулятив вазиятлар ва ноқонуний ҳаракатлар содир этилаётгани»ни тан олди. Қайд этилишича, «Ўзавтосаноат» бундай ҳолатларга қарши фаол кураш олиб бормоқда.
«Дарё» мухбири 21 май куни UzAuto Motors’нинг Хоразм вилоятидаги янги ишлаб чиқариш қувватларига уюштирилган пресс-тур давомида компания бош директори Рустам Ражабовдан «шапка» тизими қайта тикланганига доир аҳоли орасида тарқалаётган гап-сўзларга муносабатини сўраган эди. UzAuto Motors раҳбари бу каби хавотирли гап-сўзлар Асакадаги автозаводда айрим талабгир автомобиль моделларини ишлаб чиқариш ҳажми кескин пасайгани билан боғлиқ бўлиши мумкинлигини қайд этиб, ишлаб чиқариш қасддан ёки сунъий пасайтирилмаётганини таъкидлаган эди.
«Асака заводимизда ҳақиқатдан ҳам Spark, Nexia, Cobalt ва Lacetti автомобилларини ишлаб чиқариш тахминан 30—40 фоизга тушиб кетди. Бу атайин ёки сунъий қилингани йўқ. Дунё бўйича автомобиль ишлаб чиқариш бозорида микросхемалар етишмовчилиги кузатилмоқда. Масалан, General Motors’нинг Бразилия, АҚШ, Жанубий Кореядаги айрим заводлари тўрт ойдан буён тўхтаб турибди», — деди Ражабов.
Мавзуга доир: Шавкат Мирзиёев «Ўзавтосаноат»да ишлаб чиқариш ҳажми 40 фоизга камайиб кетганини танқид қилди
«Микросхема муаммосини бартараф этиш ҳар ҳафта бўйича етказиб берувчи компаниялар билан музокаралар олиб боряпмиз. Етказиб берувчилар таъминотдаги узилишлар аниқ бир санада бартараф этилиши бўйича 100 фоизлик кафолат бераётгани йўқ. Тақчиллик 2021 йилнинг учинчи ёки тўртинчи чорагида ҳал бўлишига умид қилиб турибмиз», – дея қўшимча қилди Ражабов.
UzAuto Motors бош директорнинг алоҳида таъкидлашича, «шапка» тизимига ҳеч қачон қайтилмайди. «Биз бу билан куряшпмиз, йўлимиздан ҳеч қачон қайтмаймиз. Шахсан мен ‘шапка’ пайдо бўлганини эшитмадим, лекин бозорда нархлар кўтарилганини эшитдим», — деди у.
Изоҳ (0)