“Biz ‘shapka’larga qarshi kurashyapmiz, bu yo‘limizdan hech qachon qaytmaymiz” — UzAuto Motors rahbari

31-may kuni ijtimoiy tarmoqlardagi rasmiy doiralarga aloqador manbalarda UzAuto Motors avtomobillarini sotib olish uchun “shapka” tizimi qayta tiklangani haqida xabarlar paydo bo‘ldi (aslida odamlar orasida bu kabi gap-so‘zlar Asakadagi avtozavod faoliyatida 2021-yil fevral oyida kuzatilgan salkam bir oylik tanaffusdan so‘ng, avtomobillarni yetkazib berish o‘rtacha 1—2 oyga kechikishi ma’lum qilinganidan keyin paydo bo‘lgan edi).

UzAuto Motors bu kabi gap-so‘zlarga munosabat bildirarkan, avtomobil ishlab chiqarishning keskin pasayib ketishi ortidan yuzaga kelgan taqchillikdan “ba’zi bir vijdonsiz subyektlar” foydalanishga urinib, “spekulyativ vaziyatlar va noqonuniy harakatlar sodir etilayotgani”ni tan oldi. Qayd etilishicha, “O‘zavtosanoat” bunday holatlarga qarshi faol kurash olib bormoqda.

“Daryo” muxbiri 21-may kuni UzAuto Motors’ning Xorazm viloyatidagi yangi ishlab chiqarish quvvatlariga uyushtirilgan press-tur davomida kompaniya bosh direktori Rustam Rajabovdan “shapka” tizimi qayta tiklanganiga doir aholi orasida tarqalayotgan gap-so‘zlarga munosabatini so‘ragan edi. UzAuto Motors rahbari bu kabi xavotirli gap-so‘zlar Asakadagi avtozavodda ayrim talabgir avtomobil modellarini ishlab chiqarish hajmi keskin pasaygani bilan bog‘liq bo‘lishi mumkinligini qayd etib, ishlab chiqarish qasddan yoki sun’iy pasaytirilmayotganini ta’kidlagan edi.

“Asaka zavodimizda haqiqatdan ham Spark, Nexia, Cobalt va Lacetti avtomobillarini ishlab chiqarish taxminan 30—40 foizga tushib ketdi. Bu atayin yoki sun’iy qilingani yo‘q. Dunyo bo‘yicha avtomobil ishlab chiqarish bozorida mikrosxemalar yetishmovchiligi kuzatilmoqda. Masalan, General Motors’ning Braziliya, AQSh, Janubiy Koreyadagi ayrim zavodlari to‘rt oydan buyon to‘xtab turibdi”, — dedi Rajabov.

“Mikrosxema muammosini bartaraf etish har hafta bo‘yicha yetkazib beruvchi kompaniyalar bilan muzokaralar olib boryapmiz. Yetkazib beruvchilar ta’minotdagi uzilishlar aniq bir sanada bartaraf etilishi bo‘yicha 100 foizlik kafolat berayotgani yo‘q. Taqchillik 2021-yilning uchinchi yoki to‘rtinchi choragida hal bo‘lishiga umid qilib turibmiz”, – deya qo‘shimcha qildi Rajabov.

UzAuto Motors bosh direktorning alohida ta’kidlashicha, “shapka” tizimiga hech qachon qaytilmaydi. “Biz bu bilan kuryashpmiz, yo‘limizdan hech qachon qaytmaymiz. Shaxsan men ‘shapka’ paydo bo‘lganini eshitmadim, lekin bozorda narxlar ko‘tarilganini eshitdim”, — dedi u.