Самарқанд вилояти Халқ таълими бошқармаси Тойлоқ туманидаги 59-сонли мактаб директорининг ўринбосари ўқувчиларнинг қариндошлари томонидан калтаклангани тўғрисида тарқалган хабарларга муносабат билдирди.
Маълум қилинишича, 26 май куни содир бўлган ушбу ҳолатнинг келиб чиқишига мактаб директори ўринбосари А.С.нинг имтиҳонларга кечикиб келган ўқувчиларга берган танбеҳи сабаб бўлган.
Унинг ўқувчилардан тартиб-интизомни талаб қилгани, имтиҳон жараёнларида ўз вақтида иштирок этишни сўрагани 9-«А» синф ўқувчиси А.Ш. ва унинг баъзи яқинларига ёқмаган. Зўравон йигитлар мактабга бостириб келиб, директор ўринбосарини калтаклаган ва унга жароҳат етказган.
Самарқанд вилояти ИИБ ахборот хизматининг маълум қилишича, ушбу ҳолат бўйича 31 май куни Тойлоқ туман ИИБ ҳузуридаги тергов бўлими томонидан М.Ш. ва бошқаларга нисбатан Жиноят кодексининг 277-моддаси (безорилик) 2-қисми «б» банди билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Таъкидланишича, олган жароҳатлари туфайли бир кун давомида шифокорларнинг назоратида бўлган А.С.нинг аҳволи яхши.
Аввалроқ Навоийда ўқувчи қизнинг онаси фарзандидан мактабга формада келишини сўраган ўқитувчини калтаклагани, Қашқадарёда ўқувчига танбеҳ берган ҳомиладор ўқитувчи калтаклангани ва аёл ҳомила тушиш хавфи билан туғруқхонага ётқизилгани тўғрисида хабар берилганди.
Изоҳ (0)