Ўзбекистон Марказий Осиё давлатлари раҳбарларининг маслаҳат учрашуви юзма-юз кўринишда ўтказилишига умид қилмоқда
Ўзбекистон илгари 2020 йилда режалаштирилган Марказий Осиё давлатлари раҳбарларининг учинчи маслаҳат учрашуви юзма-юз форматда ўтказилишига умид қилмоқда. Бу ҳақда Президент матбуот котиби Шерзод Асадов 31 май, душанба куни ўтказилган брифингда маълум қилди, деб ёзмоқда «Gazeta.uz».
Марказий Осиё давлатлари раҳбарларининг навбатдаги учинчи маслаҳат учрашуви 2020 йил августда Бишкекда бўлиб ўтиши керак эди, кейин саммит кузга кўчирилди, аммо коронавирус пандемияси сабабли 2021 йилга қолдирилганди. Кейинчалик Ўзбекистон ТИВ раҳбари Абдулазиз Комилов маҳаллий ОАВга берган интервьюсида саммит 2021 йилда Туркманистонда ўтказилиши мумкинлигини маълум қилди.
«Бу йўналишдаги ишлар давом эттирилмоқда. Аммо энг муҳими, биз ушбу учрашувнинг юзма-юз форматда ўтишини таъминлаш учун иш олиб боряпмиз. Онлайн формат кўзда тутилмаган», — деган Шерзод Асадов учинчи учрашувнинг эҳтимолий санаси ҳақидаги саволга жавобан.
Президент матбуот котиби пандемия шароити ҳозирда навбатдаги учрашув жойи ва санасини айтиш имконини бермаслигини таъкидлаган.
«Биз шерикларимиз билан ҳамкорликда бир йилдан буён навбатдаги учрашувга тайёргарлик кўряпмиз. Имзолаш учун кенг ва залворли ҳужжатлар тўплами тайёрланмоқда», — деб қўшимча қилган у.
Эслатиб ўтамиз, Марказий Осиё давлат раҳбарларининг маслаҳат учрашувларини мунтазам ўтказиш ташаббуси Ўзбекистон Президенти Шавкат Мирзиёев томонидан 2017 йил сентябрь ойида БМТ Бош Ассамблеясининг 72-сессиясида илгари сурилган эди. Бундай биринчи йиғилиш 2018 йил март ойида Қозоғистон пойтахтида, иккинчиси эса 2019 йил ноябрда Тошкентда ўтказилган ва ўшанда учинчи учрашувни Бишкекда ўтказишга қарор қилинганди.
