Бош прокуратура ижтимоий тармоқларда Андижон вилоятининг Олтинкўл туманида келин қайнонасини жойнамоз устида кетмон билан чопиб ўлдиргани юзасидан тарқалган хабарларга муносабат билдирди.
Маълум қилинишича, ҳолат юзасидан Жиноят кодексининг 104-моддаси 3-қисми «д» банди (жабрланувчининг ўлишига сабаб бўлган қасддан баданга оғир шикаст етказиш) билан қўзғатилган жиноят иши юзасидан Олтинкўл тумани ИИБ тергов бўлинмаси томонидан тергов ҳаракатлари олиб борилмоқда.
Бош прокуратура матбуот хизматининг «Дарё»га маълум қилишича, мазкур фожиа 2021 йилнинг 14 апрель куни Олтинкўл тумани «Марказ» маҳалласидаги Маориф кўчасида содир бўлган.
Маълумотларга кўра, М.Э. исмли эркак 14 апрель куни соат 17:42 ларда ўзи яшаб келаётган хонадонда истиқомат қилувчи 79 ёшли аёл билан хонадонни девор орқали бўлиш масаласида тортишиб қолган. М.Э. қўлида бўлган кетмон билан аёлнинг бош қисмига уриб, оғир тан жароҳати етказган ва унинг ўлимига сабабчи бўлган. М.Э. — марҳуманинг собиқ келини билан турмуш қурган қўшни эркак.
Ҳодиса жойи катта терговчи Ш.Тожибоев томонидан кўздан кечирилиб, баённома расмийлаштирилган, ҳодиса жойи чизмаси ва фотожадваллари тузилган. Кўздан кечириш давомида 2 дона хўжалик кетмони, 1 дона темир кетмон ва қонга ўхшаш доғлардан намуналар олинган, шунингдек, аёлнинг мурдаси мутахассис иштирокида кўздан кечирилган.
Иш бўйича 14 апрель куни марҳумнинг мурдаси бўйича суд-тиббий экспертиза тайинланиб, экспертнинг 19 майдаги 128-сонли хулосаси олиниб, иш ҳужжатларига қўшилган.
Эксперт хулосасида жабрланувчи бош мия ёпиқ шикасти, бош гумбаз ва асос суякларининг очиқ синиши, бош мия тўқимасининг мажақланиши, бош мия лат ейиши, бош мия тўқимасига қон қуйилиши, узунчоқ мия, мияча, ўрта мия ва орқа мия бўйин соҳалари пардалари остига, мия тўқималарига ўчоқли қон қуйилишлари, бош ўнг чакка тепа соҳасида чопилган ва лат еб йиртилган яралар, бош ўнг чакка тепа соҳасида териости қон қуйилиши, ўнг кўз юқори ва пастки қовоқлар, ўнг қулоқ супраси соҳаларида шилинма ва қонталашлар, ўнг қўл 5-кафт суягининг очиқ синиши, чап ва ўнг қўл ўнг ён бош соҳаларида шилинмалар, қонталашлар аниқлангани, ушбу жароҳатлар унинг ўлимига сабабчи бўлганлиги кўрсатилган.
М.Э. Жиноят-процессуал кодекснинг 221-моддаси тартибида ушланиб, унга нисбатан 15 апрель куни Жиноят кодексининг 104-моддаси (қасддан баданга оғир шикаст етказиш) 3-қисми «д» банди билан айб эълон қилинган ва қамоққа олиш тарзидаги эҳтиёт чораси танланган.
Айбланувчи М.Э. ўзининг кўрсатмасида жабрланувчи яшаш хонадонидан кетмон олиб чиқиб, «вой-дод мени уряпти» деб бақиргани сабабли барибир туҳматда қоламан дея ўйлаб, қўлидаги кетмон билан аёлнинг бошига бир маротаба урганини билдирган.
Бироқ иш бўйича асосий гувоҳ ҳисобланган Ў.У. айбланувчи М.Э. яшаш хонадони ичкарисида усталар билан жанжаллашиб, уларни қувлаб кўчага кетмон билан чиққанини билдирган. Таъкидланишича, М.Э. шу вақтда кўчада марҳума турганини кўриб, унинг олдига кетмон билан югуриб борган ва бир марта кетмоннинг кесувчи қисми билан аёлнинг бошига урган. Шундан сўнг эркакнинг қўлидаги кетмонни ўша ерда бўлган усталар унинг қўлини қайириб, олиб қўйган ва М.Э.ни ички ишлар ходимларига топширган.
Тергов давомида иш бўйича ҳолатга гувоҳ бўлган қўшимча гувоҳлар ҳамда марҳуманинг қизи гувоҳ тариқасида сўроқ қилиниб, жабрланувчи ва фуқаровий даъвогар сифатида иштирок этишга жалб қилинган.
Изоҳ (0)