Украинанинг Таиланддаги элчиси Андрей Бешта 45 ёшида вафот этди. Бу ҳақда Украина Ташқи ишлар вазирлигига таяниб «РБК» хабар берди.
«30 май куни Украинанинг Таиланддаги фавқулодда ва мухтор элчиси 45 ёшли Андрей Петрович Бешта вафот этди», — дейилади хабарда.
Вазирлик марҳумнинг оиласи ва яқинларига ҳамдардлик билдирди. Украина президенти Владимир Зеленский ҳам таъзия изҳор этди ва Бештанинг юқори профессионал фазилатларини қайд этди.
«У оқкўнгил инсон ва давлатимиз манфаатларига садоқат билан хизмат қилган юқори малакали дипломат эди», — деди президент.
Таиланд полицияси маълум қилишича, дипломат Ко Липе оролидаги меҳмонхонасида ўлик ҳолда топилган. Ғайритабиий ўлим белгилари топилмаган. Бангкок постига кўра, маҳаллий касалхонада ўтказилган дастлабки текширув натижалари ўлим сабаби ўткир юрак етишмовчилиги бўлиши мумкинлигини кўрсатди. Шунингдек, дипломатда COVID-19 ҳам аниқланмади.
Андрей Бешта Иван Франко номидаги Львов миллий университетининг халқаро алоқалар факультетини тугатгандан сўнг 1998 йилда Украина Ташқи ишлар вазирлигида иш бошлаган.
У Нью-Йоркдаги БМТ офисида Украинанинг доимий ваколатхонасида ва Таиланддаги Украина элчихонасида ишлаган, БМТ Бош ассамблеясининг 67—70-сессияларида Украина делегациясининг аъзоси сифатида иштирок этган. У 2015 йилдан буён Украинанинг Таиланддаги элчиси бўлиб ишларди. Шунингдек, у 2017 йилдан бери Украинанинг Лаос ва Мьянмадаги элчиси вазифасини ҳам ўтаб келарди.
Изоҳ (0)