Диетологлар коронавирусдан кейин организмни тиклаш учун энг фойдали озиқ-овқат маҳсулотлари номини маълум қилди. Бу ҳақда Ҳиндистоннинг The Pioneer газетаси хабар берди.
Диетолог Прити Тяги коронавируснинг янги инфекциясини юқтириб олганлар рационига янада мураккаб углеводларни, масалан, дон маҳсулотларини киритишни маслаҳат беради. Бундан ташқари, у кўпроқ йогурт истеъмол қилишни, қўзиқоринли дамлама ичишни, бодринг ва ловия тановул қилишни тавсия қилади. Буларнинг барчаси, унинг фикрига кўра, ичак микрофлорасини тиклашга ва иммунитет тизимини мустаҳкамлашга ёрдам беради.
Шунингдек, доктор Тяги нонушта пайтида бир ҳовуч ёнғоқ, бодом ёки ошқовоқ уруғини истеъмол қилишни ҳам қўшиб ўтди, улар тананинг касалликдан халос бўлишига ёрдам берадиган омега-3 тўйинмаган ёғ кислоталарига бой. Ёнғоқда эса заифлашган организмнинг тузалиши учун муҳим рол ўйнайдиган синк, селен, оқсил ва B гуруҳ витаминлари мавжуд.
Шифокор Рохини Патил касалликдан сўнг дарҳол одатий турмуш тарзига ва овқатланишга қайтмаслик керак, деб ҳисоблайди. Аввало, Патил кунига саккиз-тўққиз соат ухлашни тавсия қилади, чунки иммун тизими янги коронавирус инфекцияси билан қаттиқ курашдан сўнг қайта тикланишни давом эттиради.
Шифокор иложи борича кўпроқ суюқлик ичишни ва ортиқча жисмоний ҳамда руҳий стрессга тушмасликни маслаҳат беради. Шунингдек, организмда табиий сув мувозанатини тиклаш учун чиа уруғи ва райҳонли сув ичишни тавсия қилади.
Изоҳ (0)