Qaysi biri uzoqroq ta’sir ko‘rsatadi: koronavirusdan keyingi immunitet yoki unga qarshi vaksina? Mutaxassis javob berdi

Sanitariya-epidemiologik osoyishtalik va jamoat salomatligi xizmati rahbarining o‘rinbosari Botir Qurbonov koronavirusdan keyingi immunitet yoki unga qarshi vaksinadan qaysi biri uzoqroq ta’sir ko‘rsatishi borasidagi savolga javob berdi.

Foto: Innovatsion rivojlanish vazirligi matbuot xizmati

Qurbonovning so‘zlariga ko‘ra, insonlarda infeksiya bilan kasallanish natijasida tabiiy immunitetning shakllanishi turlicha — bu organizmning o‘ziga xosligiga bog‘liq. “Mazkur virus yangi bo‘lgani sabab hozircha aniq javobni bera olmaymiz. Mavjud ma’lumotlarga ko‘ra, u dastlabki kasallanishdan keyin 90 kungacha davom etishi mumkin. Koronavirusga qarshi vaksinaning real hayotga ta’siri esa ayni vaqtda barcha xalqaro tadqiqot institutlari va vaksina ishlab chiqaruvchilar tomonidan o‘rganilmoqda. Bir narsani — vaksinatsiyadan keyingi immunitet davomiyligini ishonch bilan aytish mumkin: barcha tadqiqotchilarning ta’kidlashicha, ushbu vaksinalar emlanganidan so‘ng bir yil davomida kasallikka qarshi immunitet hosil qiladi”, — deydi Botir Qurbonov. Avvalroq Botir Qurbonov O‘zbekiston aholisini koronavirusga qarshi emlash fevral oyining oxiri, mart oyining boshida boshlanishini aytgandi. Nurmat Otabekov O‘zbekistonda dastlabki bosqichda 50 mingga yaqin kishi COVID-19’ga qarshi emlanishini ma’lum qilgan. Bunda birinchi navbatda koronavirus yuqish xavfi darajasi yuqori bo‘lgan shaxslar emlanadi va u faqatgina ixtiyoriylik tamoyili asosida amalga oshiriladi. Qoraqalpog‘iston Respublikasi, viloyatlar va Toshkent shahridagi davolash profilaktika muassasalari qoshida 3138 ta emlash xonalari va 820 ta mobil brigadalar tashkil etilgan, ular barcha emlash ishlarini jadval bo‘yicha va bosqichma-bosqich amalga oshiradi. JSST qo‘llashga ruxsat bergan Pfizer hamda BioNTech korxonalari tomonidan ishlab chiqilgan vaksinani O‘zbekistonda ham emlash jarayoniga jalb qilish uchun 100 ming dozaga rasman buyurtma berilgan. Fevral o‘rtalarida O‘zbekistonda koronavirusga qarshi “Sputnik V” vaksinasini qo‘llashga ruxsat berildi. Botirjon Qurbonov hozirda Toshkentdagi Virusologiya ilmiy-tekshirish instituti klinikasida Pfizer-BioNTech vaksinasini 70 daraja sovuqda saqlash imkonini beradigan muzlatgichlar hozirlab qo‘yilganini bildirgan.