Луис Суарес — 2020/2021 йилги мавсумнинг бош қаҳрамони бўлиб, тарихга кирди (ҳар ҳолда Испанияда шундайлигига ҳеч кимда ҳеч қандай шубҳа йўқ). Уругвайлик ҳужумчининг «Атлетико»нинг Ла Лигада чемпион бўлишида ҳиссаси беқиёс бўлди. Кучли бешлик чемпионатларида ҳеч бир ҳужумчи Суарес каби ўз жамоаси ўйинига кучли таъсир ўтказа олгани йўқ. Исбот? Марҳамат!
Ғалаба голлари
Суареснинг «Атлетико» ғалабасига қўшган ҳиссасини кўрсатадиган асосий кўрсаткич, бу шубҳасиз, ғалаба голларидир. Тўғри, уругвайлик футболчи 2020/2021 йилги мавсумда кўп гол уролмади (атиги 21 та), аммо шу голлардан тенг ярми якунда жамоага ғалаба келтирди.
Ҳал қилувчи голлар сони бўйича Суарес топ-5 лигалардаги барча ҳужумчиларни ортда қолдиришга муваффақ бўлди. Таққослаш учун, Роберт Левандовскида бу кўрсаткич 10 тага тенг, «Севилья» ҳужумчиси Юсуф эн-Несирида эса 9 та. Карим Бензема ва Криштиану Роналду 8 тадан ғалаба голига муаллифлик қилган бўлса, Лионель Месси ҳамда Килиан Мбаппе атиги 7 та билан чекланди.
Вазиятлардан фойдаланиш
Ла Лига ўйинларида Суарес рақиб дарвозасига 104 марта зарба берди. Зарбаларнинг аниқлиги эса 20 фоизни ташкил этди, яъни ўртача ҳар бешинчи зарба голга айланган. Месси эса деярли икки баравар кўпроқ зарба берган — 196 марта. Леонинг голлари ҳам Суаресникидан кўпроқ (30 та). Аммо уларнинг самаралилик даражаси Луисники билан солиштирилганда сезиларли даражада паст — 15,3%.
Дарвоза томон томон камида 100 марта зарба берган футболчилардан (Европада) фақат икки нафари Суаресдан яхшироқ натижа кўрсатган: Килиан Мбаппе (25,7%) ва Роберт Левандовски (29,9%). Яна бир даҳо Роналдуда эса бу кўрсаткич атиги 17,2 фоизни ташкил этди — унинг 168 та зарбасидан бор-йўғи 29 таси гол билан якунланган.
Суареснинг ушбу мавсумни ажойиб ўтказганини тасдиқловчи яна бир нечта рақам ва фактлар:
- Суарес уч йил ичида илк марта Испания чемпионатида 20+ гол урди;
- Суарес 2015/16 йилги мавсумдан бери Испания Ла Лигасида «Атлетико» сафида камида 20 та гол урган илк ўйинчи бўлди. Ўшанда ҳозир «Барселона»да ўйнаётган Антуан Гризманн 22 та гол урганди.
- Суарес «Атлетико»нинг умумий голларининг деярли учдан бир қисмини урди — 67 тадан 21 та (31,3%). Бунгача унинг энг яхши натижаси 2015/2016 йилги мавсумда, «Барса» таркибида ўйнаган кезлари кузатилганди — (35,7%).
Изоҳ (0)