Наманганда гуллар фестивалига қизғин ҳозирлик кўрилмоқда. Бу ҳақда «Дарё» мухбири Азизбек Абдувалиев хабар бермоқда.
Фестиваль олтмишинчи бор ўтказилмоқда ва халқаро мақомга эга.
Байрамга Ўзбекистонда фаолият олиб бораётган дипломатик корпус вакиллари ва Наманган билан биродарлашган ҳудудлар делегациялари ҳам таклиф этилган.
Улар қаторида Покистоннинг Панжоб, Россиянинг Челябинск ва Свердловск, Қирғизистоннинг Жалолобод вилоятлари, Туркиянинг Испарта ва Усмонғози, Хитойнинг Циндао, Жанубий Кореянинг Инчхон, Беларуснинг Могилёв шаҳарлари бор.
Фестивалнинг асосий тадбирлари эртага, 23 май куни соат 10:00 да байрамона безатилган автопарад билан бошланади.
Бобур номли маданият ва истироҳат боғига келган меҳмонлар Наманганнинг бой тарихи, ҳудудлари, етакчи корхона ва ташкилотлари ҳақида яққол тасаввурга эга бўлади.
Боғ ташқарисида ташкил этиладиган ярмаркада эса турфа гул ва кўчатлар билан танишиш ҳамда харид қилиш мумкин.
Очилиш ва ёпилиш маросимлари, шунингдек, байрам кунлари Наманган саҳналарида таниқли актёрлар ва ўзбек эстрадаси юлдузларининг чиқишлари ташкил этилади.
Фестиваль якунида байрамда фаол иштирок этган ва ҳакамлар ҳайъатининг энг кўп овозларини тўплаган гулчилар ҳамда ташкилотлар Nexia 3 автомобиллари билан тақдирланади.
Изоҳ (0)