Россия президенти Владимир Путин Ғазо секторидаги Россия ва МДҲ давлатлари фуқароларини уларнинг хоҳишига қараб, сектордан эвакуация қилиш тўғрисидаги фармонни имзолади. Ҳужжат ҳуқуқий ахборот расмий интернет порталида эълон қилинди.
«Исроил Қуролли кучларининг ҳарбий амалиёти натижасида Ғазо секторидаги вазиятнинг кескин ёмонлашуви муносабати билан сектордаги Россия фуқаролари ва МДҲга аъзо давлатлар фуқароларини, ўз истагига қараб эвакуация қилиш назарда тутилсин», — дейилади ҳужжатда.
Президент Ташқи ишлар вазирлиги, Ташқи разведка хизмати ва Россия Фавқулодда вазиятлар вазирлигига фуқароларни Москвага эвакуация қилишнинг аниқ саналари ва шаклини белгилашни буюрди.
Бундан аввал Исроил ва ҲАМАС ўт очишни тўхтатиш ҳақида келишиб олгани ҳақида хабар берилди. Унга кўра, Исроил ва ҲАМАС ўртасидаги ўт очишни тўхтатиш режими Фаластин ва Исроил вақти билан 2:00 да (Тошкент вақти билан 4:00) кучга кирди.
Al Jazeera телеканали хабар қилишича, Ғазо секторида ва Фаластин ҳудудларида минглаб одамлар кўчага чиқиб, ярашувни тантана қилган. Фаластиннинг Рамоллаҳ шаҳрида мушаклар отилди, баъзи одамлар қуролдан ҳавога ўқ узди.
Исроилнинг The Times of Israel газетаси хабарига кўра, ярашув эълон қилиниб, у кучга киргунича Ғазо яқинидаги баъзи Исроил шаҳарлари ракета ва миномётлар билан ўққа тутилган. Бир киши жабрланган.
Фаластин ташқи ишлар вазири Исроил томонидан ўт очишнинг тўхтатилиши етарли эмаслигини айтди. Унинг таъкидлашича, можаро Қуддусдаги мусулмонларнинг аҳволи ҳамда шаҳарнинг баъзи жойларидан фаластинлик оилаларни ҳайдаб чиқариши билан қўзғатилган. Ташқи ишлар вазири ушбу муаммоларни ҳал қилиш кераклигини айтди.
Изоҳ (0)