O‘zbekistonda 2021-yilning 1-oktabrigacha xalqaro va viloyatlararo magistral yo‘llar yoqasida namunaviy loyihalar asosida kamida 500 tadan savdo va xizmat ko‘rsatish obyekti tashkil etiladi. Bu haqda 22-aprel, payshanba kuni Prezident Shavkat Mirziyoyev raisligida o‘tkazilgan videoselektor yig‘ilishida so‘z yuritildi, deya xabar bermoqda “Daryo” muxbiri.
“Transport vaziri Ilhom Mahkamov viloyat hokimlari bilan birga ikki oy muddatda xavfsizlik talablariga to‘liq amal qilgan holda, joylardagi aeroport, temiryo‘l va avtovokzallar hududlarida savdo va xizmat ko‘rsatish obyektlarini tashkil etish bo‘yicha tanlov o‘tkazib, loyihalarni boshlaydi.
Viloyat hokimlari mas’ul vazirliklar rahbarlari bilan birga 2021-yil 1-oktabrga qadar xalqaro va viloyatlararo magistral yo‘llar yoqasida, namunaviy loyihalar asosida kamida 500 tadan savdo va xizmat ko‘rsatish obyektini tashkil etishi va 50 mingta yangi ish o‘rni yaratishi shart.
Bosh vazir maslahatchisi Olimjon Umarov, axborot texnologiyalari va kommunikatsiyalarini rivojlantirish vaziri Shuhrat Sodiqov axborot sohasida xususiy sektor ishtirokini yanada kengaytirish, narxlarni arzonlashtirish va sifatini oshirish hisobiga aloqa va internet xizmatlari hajmini kamida 2 baravarga (20 trillion so‘m) va dasturlashni esa 3 baravarga (2,5 trillion so‘m) oshirishni ta’minlasin.
G‘aniyev, Xo‘jayev, Hamroyev viloyat hokimlari bilan birga ikki hafta muddatda har bir paxta va g‘alla klasterlarida eng muhim turdagi agroxizmatlar ko‘rsatishni yo‘lga qo‘yadi. Bunda, agrar sohada 17 ta yo‘nalishdagi xizmatlardan qanchasini klasterlar tashkil etilishini belgilab, klasterlar kesimida taqsimlaydi va ijrosini shaxsan nazoratga oladi”, — dedi davlat rahbari.
Bundan avval Shavkat Mirziyoyev 2021-yilda ko‘p qavatli uylarga xizmatlar ko‘rsatish hajmi kamida 3 baravarga oshirilishini aytgani, Andijondagi korrupsiya holatlarini tanqid qilgani hamda xizmatlar bozorini jadal rivojlantirish uchun 500 million dollar ajratilganini ma’lum qilgani haqida xabar berilgandi.
