Ўзбекистон давлат органлари томонидан атиги 18 турдаги маълумотномаларга бўлган талабнинг бекор қилиниши ҳар йили қарийб 15 миллион долларни тежаш имконини беради ва 12 миллиондан ортиқ фуқароларнинг (аҳолининг 35 фоизи) ҳаётига ижобий таъсир кўрсатади. Бу ҳақда адлия вазири Русланбек Давлетов 19 май куни Петербург халқаро юридик форумида сўзга чиққанида айтиб ўтди, деб хабар бермоқда «Gazeta.uz» Адлия вазирлиги матбуот хизматига таяниб.
Эслатиб ўтамиз, март ойида Шавкат Мирзиёев бюрократик тўсиқларни қисқартириш бўйича фармонни имзолаганди. Ўшанда 17 турдаги ҳужжат ва маълумотномаларни талаб қилиш бекор қилинганди. 2020 йилдан бошлаб фуқаролардан қарийб 30 турдаги маълумотномани, шу жумладан, яшаш жойидан маълумотнома, ишсизлик тўғрисидаги маълумотнома ва бошқа маълумотномаларни талаб этиш тақиқланди.
Вазир 2021 йил якунигача давлат хизматлари сонини 200 тага етказиш, шунингдек, барча давлат хизмати инвентаризация қилиниб, уларнинг муддатлари, тўлов миқдорлари, шартлари ва бошқа талаблари соддалаштирилишини маълум қилди.
Русланбек Давлетов Адлия вазирлиги томонидан бошқариладиган License тизими туфайли лицензия бериш ва хабардор қилиш тартиб-таомиллари электрон шаклга ўтказилганини, шу билан бирга, рақамлаштириш жараёнида лицензия ва рухсатнома олиш талаб қилинадиган фаолият турлари деярли 40 фоизга қисқарганини қайд этган.
«Лицензиялар ва рухсатномаларнинг махсус бланкаларда расмийлаштирилишидан воз кечилиши ва электрон ҳужжатлар беришга тўлиқ ўтилиши натижасида 1,5 миллион доллардан зиёд маблағ, шунингдек, 3,5 миллион варақ қоғоз иқтисод қилинди. Бундан ташқари, рақамли ечимларни жорий этиш ҳисобига Адлия вазирлиги томонидан ўтган йили 100 тонна қоғоз иқтисод қилинди», — деган адлия вазири.
Изоҳ (0)