Шоир ва ёзувчи Акром Малик «Илҳом» мукофоти республика танловида ғолиб бўлди. У Spark билан тақдирланди

Адиблар хиёбонида 20 май куни «Катта адабиёт байрами» ҳафталиги доирасида «Илҳом» мукофоти республика танловининг совриндорларини тақдирлаш маросими бўлиб ўтди. Бу ҳақда ЎзА хабар бермоқда.

Танлов шоир ва ёзувчилар ижодини ўрганиш, асарларни таржима қилиш, шу асосда тадқиқотлар ўтказишда юқори натижаларга эришаётган ёшлар ўртасида ўтказилди.

Танловда 1-ўринга Алишер Навоий номидаги Тошкент давлат ўзбек тили ва адабиёти университети 2-босқич магистранти Акром Маликов муносиб топилди. У Spark автомобили билан тақдирланди.

2-ўринга Тошкент давлат шарқшунослик университети жамоаси лойиқ кўрилиб, 30 миллион сўм пул мукофоти билан тақдирланди.

3-ўринни Фарғона давлат университети талабаси Қобилжон Шерматов ҳамда Қорақалпоқ давлат университети таянч докторанти Малика Палимбетова қўлга киритди. Улар 15 миллион сўм пул мукофотлари билан тақдирланди.

Мукофотларни Ўзбекистон Президенти маслаҳатчиси Абдужаббор Абдувоҳидов ҳамда бош вазир ўринбосари Беҳзод Мусаев топширди.

Эслатиб ўтамиз, Акром Малик 2016 йилнинг июль ойида МХХ томонидан қамоққа олинган, Жиноят кодексининг 159-моддаси (конституцион тузумга тажовуз) ҳамда 244-моддаси (жамоат хавфсизлигига таҳдид) билан айбланиб, 6 йилга озодликдан маҳрум этилган эди. У 2020 йил 27 август куни озодликка чиқди.