Қашқадарё вилоятининг Нишон туманида тез тиббий ёрдам шифокори ёнига нажот истаб борган беморни унинг хатти-ҳаракатига жавобан тилга олиб бўлмас сўзлар билан ҳақоратлади. Вилоят соғлиқни сақлаш бошқармаси ахборот хизмати раҳбари Нуриддин Эгамовнинг «Дарё»га хабар беришича, ушбу воқеа сабаб шифокор ишдан кетган.
Маълум қилинишича, Нишон туман тиббиёт бирлашмаси тез тиббий ёрдам бўлими Нуристон шохобчаси навбатчи врачи Б.Ҳ. бемор М.Р. билан иш пайтида тортишиб қолиб, беморнинг «эркакмисан, чиқ буёққа», дея айтган сўзларига жавобан уни ҳақорат қилган.Нуриддин Эгамовнинг айтишича, туман тиббиёт бирлашмасининг 19 майдаги буйруғига асосан навбатчи врач Б.Ҳ. Меҳнат кодексининг 99-моддаси 2-қисмига кўра, яъни ўзининг ташаббуси билан эгаллаб турган лавозимидан озод қилинган.
Нишон туман тиббиёт бирлашмаси бош шифокори Икром Бозоровнинг «Дарё» мухбирига маълум қилишича, бемор билан тортишган шифокор туманда етишмаётган шифокорлар ўрнини тўлдириш мақсадида хусусий клиникадан бирлашманинг тез тиббий ёрдам бўлими Нуристон шохобчасига ишга жалб қилинган бўлиб, воқеа юз берган куни ўз хоҳиши билан бўшаш ҳақида ариза ёзган.
Вилоят Соғлиқни сақлаш бошқармаси ахборот хизматининг қўшимча маълумот беришича, вилоятда даволаш-профилактика муассасаларида фаолият кўрсатадиган врачлар учун 8418,75 штат бирлиги ажратилган. Айни пайтда 7372,0 штатда 4980 нафар врач фаолият кўрсатади. Ҳозирги вақтда 1046,25 штат бирлигида вакант ўринлар мавжуд.
Изоҳ (0)