Буюк Британия пластик чиқиндиларни Туркияга ёппасига экспорт қилишда айбланмоқда. Бу ҳақда Greenpeace халқаро экология ташкилотининг ҳисоботига таяниб, Tengrinews хабар берди.
Ҳисоботда айтилишича, Буюк Британия пластик чиқиндилар муаммосини ҳал қилишда самарасиз фаолият олиб бормоқда ва бундай чиқиндиларнинг аксарияти мамлакат ичида қайта ишланмай, чет элга олиб чиқиляпти. Greenpeace бундай хатти-ҳаракатни «экологик ирқчилик» деб атади.
Экологларнинг маълумотларига кўра, 2020 йилда Буюк Британия 210 минг тонна пластик чиқиндиларни Туркияга чиқарган, бу Буюк Британиядаги жами пластик чиқиндиларнинг 40 фоизини ташкил қилади. Туркияда бу чиқиндилар қайта ишланмайди, балки йўллар, далалар ва сув ҳавзаларига ташлаб юборилади.
Буюк Британия муаммони назорат остига олишга чақирилганидан кейин, ҳукумат мамлакатнинг «пластик чиқиндилари билан ифлосланишга қарши курашувчи дунё етакчиси» эканини таъкидлади.
Ташкилотнинг ҳисоботида Туркия Европанинг йирик пластик чиқиндихонасига айлангани айтилади.
Хайрия ташкилоти Туркиянинг жанубидаги 10 та ҳудудни ўрганиб чиқиб, уларнинг барчасида Буюк Британиянинг супермаркетлари ва чакана савдо дўконларига тегишли полиэтилен пакетлар ва қадоқларни топганини маълум қилди.
Таъкидланишича, чиқиндилар орасидан коронавирус тестининг қадоқлари ҳам топилган. Бу шуни англатадики, экофаоллар томонидан топилган барча чиқиндилар 2020 йилда ёки 2021 йилнинг бошида Британиядан олиб келинган.
Тадқиқот натижаларига кўра, Буюк Британиядан ташқари, АҚШ, Италия, Германия каби давлатлар ҳам ўз чиқиндиларини Туркияга олиб келади. Ушбу мамлакатга ҳар куни 240 тадан ортиқ контейнерда пластик чиқиндилар келади ва уларнинг атиги 12 фоизи қайта ишланади.
Мутахассисларнинг таъкидлашича, 2016 йилдан 2020 йилгача Туркияга Буюк Британиядан кириб келган чиқиндилар миқдори 18 мартага (12 минг тоннадан 210 минг тоннагача), Германиядан кириб келган чиқиндилар миқдори 7 мартага (6,7 минг тоннадан 136 минг тоннагача) кўпайди. Уларнинг аксариятини қайта ишлаш мураккаб бўлган аралашма пластиклар ташкил қилади.
Аввалроқ Европа Иттифоқи камбағал мамлакатларга сараланмаган пластик чиқиндиларнинг экспорт қилинишини тақиқлаган эди.
Шунингдек, криптовалюта олиш учун қазиб олинаётган ёнилғилар миқдорининг ошиб бораётгани сабабли электромобил ишлаб чиқарувчи Tesla компанияси биткоинларни тўлов сифатида қабул қилишни тўхтатгани маълум бўлди.
Япония ҳукумати эса Фукусима АЭСнинг тозаланган радиоактив сувларини океанга чиқариб юборишга қарор қилди. Маҳаллий ОАВ маълумотларига кўра, ҳозирда Фукусиманинг чиқинди сувлари махсус омборларда сақланмоқда, улар тозаланган, лекин таркибида аввалгидек радиоактив тритий мавжуд.
Изоҳ (0)