Халқ депутатлари Андижон шаҳар кенгашининг 17 май куни ўтказилган навбатдаги сессиясида депутатлар тинтувдан ўтказилгани, ушбу сессияда Андижонда ер сотувчиларнинг кирдикорларини фош қилиб юрган депутатни прокурор тақдимномасига кўра дахлсизлик ҳуқуқидан маҳрум қилингани ҳақида хабар берилган эди. Коррупцияга қарши курашиш агентлиги прокурорнинг бундай ҳаракатини «оқлаб бўлмаслиги»ни маълум қилди. Агентликнинг фикрича, прокурор коррупция ҳолати ҳақида хабар берган шахсни ҳимоя қилиши керак.
«Бугунги кунда коррупцияга қарши курашиш мамлакатимиз кун тартибидаги асосий масалаларидан бири бўлиб турган, бу иллатга қарши курашишга барча давлат органлари, умуман, ҳар бир фуқаро сафарбар этилаётган бир пайтда бевосита коррупцияга қарши курашиш фаолияти билан шуғулланувчи идора томонидан коррупция ҳолати ҳақида хабар берган шахсни ҳимоя қилиш ўрнига, унга нисбатан турли таъсир чоралари қўлланилаётганини оқлаб бўлмайди», — дейилади агентлик хабарида.
Шунингдек, мазкур ҳолатнинг назоратга олингани ва натижалари бўйича қўшимча ахборот берилиши маълум қилинган.
Миллий гвардия маълумотларига кўра, Андижон шаҳар ҳокимининг топшириғига асосан сессия иши бошлангунга қадар Андижон шаҳар ИИБ, шаҳар прокуратураси ва ҳокимлигидан ажратилган масъул ходимлар кузатуви остида қўриқлаш ходими томонидан ташриф буюрган сессия қатнашувчилари металлодетектор ёрдамида кўрикдан ўтказилган ва уяли алоқа ҳамда овозли видеога олувчи воситаларини қолдириб киришлари талаб этилган.
Эслатиб ўтамиз, «Human.uz» ҳуқуқшунос Сайдали Мухторалиевга таяниб, ўша кунги сессия ўтказилиши тартиби амалдаги қонунларга зид бўлганини ёзганди. Шунга қарамай, кўпчилик депутатлар Андижон шаҳар ҳокими бошчилигида депутатни дахлсизлик ҳуқуқидан маҳрум қилган.
Ҳуқуқшунос Олий Мажлиси Сенати Кенгашининг 2010 йил 30 декабрдаги қарори билан тасдиқланган «Халқ депутатлари вилоят, туман, шаҳар Кенгашининг намунавий регламенти»нинг 11-моддасига зид тарзда прокурор тақдимномаси дастлаб «Регламент ва депутатлик одоби» масалалари бўйича доимий комиссия томонидан кўриб чиқилмаганини таъкидлаган. 12-моддасига зид тарзда Кенгаш депутатларига танишиб чиқиш учун тегишли ҳужжатлар тақдим этилмаган, сессия очиқ ошкора ўтказилмаган ва оммавий ахборот воситалари вакиллари ҳокимлик мажлислар залига киритилмаган.
Изоҳ (0)