Президент Шавкат Мирзиёев 10—12 июнь кунлари Тожикистонга расмий ташриф билан бориши тўғрисида хабар берилганди. Asia-Plus нашрининг Тожикистон ҳукуматидаги манбасига таяниб ёзишича, Ўзбекистон Президенти қўшни мамлакатга ташрифи давомида Хўжанд шаҳрига ҳам боради.
Қайд этилишича, Хўжандга ташриф давомида Шавкат Мирзиёевга Тожикистон президенти Имомали Раҳмон ҳамроҳлик қилади.
Душанбеда музокаралар ўтказилиб, 30 дан ортиқ ҳукуматлараро битимлар имзоланганидан сўнг, икки мамлакат раҳбарлари Сўғд вилояти маъмурий марказига бориши кутилмоқда. Таъкидланишича, Шавкат Мирзиёев Сўғд вилоятининг савдо-иқтисодий салоҳияти билан танишади, бир қатор саноат корхоналари ва маданий-тарихий жойларни зиёрат қилади.
«Сўғд ва Ўзбекистоннинг қўшни вилоятлари ўртасида алоқаларни ўрнатиш масалаларини вилоят раҳбарияти билан муҳокама қилиш ҳам режалаштирилган», — дейилади хабарда.
Аввалроқ Тошкентда савдо-иқтисодий ҳамкорлик бўйича Ўзбекистон—Тожикистон ҳукуматлараро комиссиянинг 8-йиғилишида иштирок этиш учун Тожикистон бош вазири мамлакатга келгани, икки мамлакат ўртасидаги савдо ҳажми 1 миллиард долларга етказилиши тўғрисида хабар берилганди.
Эслатиб ўтамиз, Шавкат Мирзиёев давлат ташрифи билан Тожикистонга 2018 йил март ойида, сўнг 2018 йилнинг сентябрь ойи охирида борганди. Кейинчалик, 2019 йил 14 июнида Осиёда ўзаро ҳамкорлик ва ишонч чоралари бўйича конференциянинг бешинчи саммитида иштирок этиш учун Тожикистонга борган.
Изоҳ (0)