Сўнгги ўн йил ичида АҚШ минглаб кишидан иборат махфий армия тузган, унинг аъзолари мамлакат ичида ҳам, чет элда ҳам Пентагоннинг турли топшириқларини бажармоқда. Бу ҳақда Newsweek газетаси икки йиллик журналистик текширувдан сўнг маълум қилди.
Америка газетасининг ёзишича, умумий ҳисобда махфий тармоқ камида 60 минг кишини ўз ичига олади, бундай агентларнинг ҳақиқий сони янада кўпроқ бўлиб чиқиши мумкин. Тармоққа 130 га яқин хусусий ташкилот, шунингдек, ўнлаб унчалик таниқли бўлмаган ва махфий федерал ташкилотлар киради.
Newsweek ҳисоб-китобларига кўра, махфий армия учун ҳар йили 900 миллион доллардан кўпроқ маблағ сарфланади. Ушбу маблағлар, хусусан, тахминий номлар остида ишлайдиган агентлар учун сохта ҳужжатлар тайёрлаш, уларнинг номидан ҳисоб-китоблар ва солиқларни тўлаш ҳамда махсус кузатув мосламалари ва ниқоблаш воситаларини яратиш учун ишлатилади.
Қайд этилишича, махфий тармоқ ходимларининг қарийб ярми махсус операция кучлари агентларидир. Улардан баъзилари Покистон ва Ғарбий Африка каби нотинч зоналарда террорчиларни кузатади, аммо улардан кўпинча Эрон ва Шимолий Корея сингари АҚШга нодўст мамлакатлардаги топшириқларни бажариш учун фойдаланилади.
Газета хабарига кўра, махфий армия таркибига турли мамлакатларда яширин фаолият олиб борадиган ҳарбий разведка мутахассислари ҳам киради. Бундан ташқари, интернетда мавжуд минглаб киберхавфсизлик ва разведка мутахассислари махфий тармоқ доирасида ишлайди. Ушбу бўлим аъзолари, бошқа масалалар қатори, Пентагоннинг махфий миссияларида қатнашадиган барча одамлар ва ташкилотлар тўғрисидаги маълумотларни яширишга ёрдам бериб, бутун тармоқ фаолияти хавфсизлигини таъминлаш билан шуғулланади.
Шундай қилиб, Newsweek Пентагонга хизмат қиладиган айғоқчилар Вашингтон расман шу каби жиноий операцияларни амалга оширишда доимий айблайдиган Россия ва Хитой агентларидан кам бўлмаган ҳаракат олиб боришини таъкидлади.
Изоҳ (0)