Идиш ювиш воситалари ошхона буюмларидаги ёғ ва озиқ-овқат қолдиқларини тозалайди, аммо улардан бошқа мақсадда ҳам фойдаланиш мумкин. Қуйида бу ҳақда батафсил маълумотга эга бўласиз.
Кийимдаги доғлар
Овқатланиш жараёнида кийим устига томган ёғни кетказиш учун идиш ювиш воситаси айни муддао. Суюқликни керакли жойга қуйиш ва қўл билан оҳиста ишқалаш зарур. Сўнгра сув билан яхшилаб чайилади. Шунингдек, эркаклар кўйлагининг ёқасидаги кирни ҳам шу тарзда тозалаш мумкин.
Ошхона ва ҳаммом поли
Бунинг учун бир челак илиқ сувга 2 ош қошиқ тозалаш воситаси аралаштирилади. Натижада ошхона ва ҳаммомнинг полини жуда осон тарзда тозалаш мумкин. Аммо ушбу аралашма ёғоч ёки паркет учун мос келмайди.
Балкон ёки ҳовлидаги мебель
Идиш ювиш воситасини илиқ сувга аралаштириб, у билан дераза олдида ёки ҳовлида жойлашган мебелларни тозалаш мумкин. Сўнгра оддий сув билан артиб чиқиш тавсия этилади.
Заргарлик буюмлари
Идиш ювиш воситаси ва сувли аралашма билан заргарлик буюмларнинг ёрқинлигини қайтариш мумкин. Бунинг учун дастлаб тақинчоқлар аралашмага 5 дақиқага солинади ва совуқ сув билан ювиб ташланади. Агар тақинчоқлар ўта хира бўлса, тиш ювиш чўткасидан ҳам фойдаланиш мумкин.
Соч учун чўтка ва тароқлар
Тароқларни тозалаш учун илиқ сувга бир неча томчи восита солинган аралашма керак бўлади. Кейин уларни тиш чўткаси билан тозалаб, ювиб ташлаш мумкин.
Кир ювишда
Агар ўта нозик матодан тикилган либослар қўлда ювилса, бир пиёла сувга бир ош қошиқ восита қўшилади. Аралашма ёрдамида кийим сифатига зарар бермасдан ювиш мумкин.
Гиламдаги доғлар
Икки стакан сув ва бир ош қошиқ идиш ювиш воситасини аралаштириб, гиламнинг доғли соҳаси мато билан ювилади. Жараён доғ кетгунча давом эттирилади. Сўнгра оддий совуқ сув билан артиб чиқилади.
Ошхона шкафлари
Ошхона жиҳозлари ҳам худди идишлар каби тез муддатда ёғли бўлиб қолиши мумкин. Бунинг учун худди юқоридагидек аралашма тайёрланиб, шкаф юзасига сепилади. Сўнгра мато билан яхшилаб артилади.
Бетондаги мой излари
Ҳовлидаги бетон юзасига машина мойи томган бўлса, истеъмол содаси ва идиш ювиш воситаси аралаштирилади. Сўнгра чўтка ёрдамида ишқалаб, бир неча соатга қолдирилади. Кейин сув билан ювиб ташланади, керак бўлса, жараён такрорланади.
Изоҳ (0)