Қорақалпоғистоннинг Мўйноқ туманида 14—15 май кунлари анъанавий тарзда ўтказиб келинаётган «Стихия» электрон мусиқий фестивали бўлиб ўтди. Бу ҳақда «Дарё» мухбири хабар бермоқда.
Туризм ва спорт вазирлиги қўллаб-қувватлаши остида «Акустика факультети» хусусий ташкилоти ташаббуси билан ўтказилган анъанавий халқаро тадбирда Қозоғистон, Қирғизистон, Тожикистон, АҚШ, БАА, Франция, Германия, Италия, Буюк Британия, Нидерландия, Жанубий Корея сингари давлатлардан келган сайёҳлар, маҳаллий ва Ўзбекистоннинг турли ҳудудларидан келган меҳмонлар иштирок этди.
Вазирлик бош мутахассиси Жўрабек Абдураҳмоновнинг таъкидлашича, фестивални ўтказишдан асосий мақсад - Мўйноққа хорижий туристлар оқимини ошириш, Ўзбекистонда ёшлар туризмини ривожлантириш ҳамда жаҳон ҳамжамиятини Орол бўйи экологик муаммосидан хабардор қилиш.
«Мазкур фестиваль юртимизда 2018 йилдан буён ўтказиб келинмоқда. 2020 йили коронавирус пандемияси туфайли ўтказилмаган эди. Бу йил анъана яна давом этяпти.
Фестивальдан мақсад шуки, дунё ҳамжамияти, айниқса, ёшлар эътиборини Орол фожиасига қаратиш. Бу ерга келган ҳар бир ёшни Орол денгизининг тарихи, унинг қуриши ва бугунги аянчли аҳволи таъсирлантириши, шубҳасиз. Улар ўз саволларига жавоб олиш орқали одамзоднинг бундай хатоликларини келажакда такрорламасликка ҳаракат қилишади, экология ва атроф-муҳитга нисбатан янада эътиборлироқ бўлишади, деб ўйлаймиз.
Фестиваль ичида нафақат мусиқа, балки маданият ҳам, илм ҳам бор. Тадбир давомида Қирғизистон, Қозоғистон, Россия, Туркиядан ташриф буюрган таниқли мусиқий продюсерлар ва ёшлар иштирокида «Стихия Н+1» илмий форуми ҳам бўлиб ўтди», — деди Абдураҳмонов.
Вазирлик вакилининг қайд этишича, бу йил фестивалга 8 минг нафарга яқин турист ташриф буюрган. Уларнинг 500 нафардан зиёдини хорижликлар ташкил этади.
Изоҳ (0)