Бухоро вилоятининг Ғиждувон туманида яшовчи 28 ёшли фуқарони маст ҳолда уйига олиб боришга уриниши зое кетган фуқаро уни уриб, тепиб, сўнгра тунаб кетди. Бу ҳақда «Дарё»га Жиноят ишлари бўйича Ғиждувон тумани суди судьяси Бобораҳим Очилов маълум қилди.
Маълум бўлишича, туманнинг «Шарқ» маҳалласида яшовчи фуқаро Ш.Х. спиртли ичимлик истеъмол қилган ҳолда соат 23:00 да туман марказидаги ресторан олдида ўзига нотаниш бўлган 28 ёшли фуқаро С.Р.ни кўриб қолган ва унга спиртли ичимлик истеъмол қилишни таклиф қилган. С.Р. ҳам бунга рози бўлиб, туман марказидаги «Ғанишер» кафесига боришни айтган. Спиртли ичимлик ичиш иштиёқидаги фуқаролар таксига ўтириб, аввалига кафега, сўнг Ш.Х.нинг талаби билан унинг уйига йўл олган. Йўлда С.Р. унинг уйига боришни рад этиб, танишини бошқа таксида уйига юбормоқчи бўлган. Ш.Х. эса уни уйига олиб кетишини айтиб, ҳоли жонига қўймаган. Уйига боришни рад этган С.Р.ни Ғиждувон туман ҳокимлиги биносининг орқа томонидаги боғ ичига судраб олиб кириб, урган.«Маст фуқаро С.Р.га тан жароҳати етказгани етмагандек, унинг эгнидаги курткаси чўнтагида бўлган 630 минг сўм пулини, Huawei русумли қўл телефонини ҳамда қўлида бўлган иккита полиэтилен пакетларни тортиб олиб, унинг мулкини очиқдан очиқ талон-торож қилиб, воқеа жойидан қочиб кетган», — дейди судья Бобораҳим Очилов.
Эртаси куни Ш.Х. фуқаро С.Р.дан талон-торожлик орқали олган пуллари билан дўконлардаги қарзини тўлаган, Huawei русумли қўл телефонини ҳам сотиб, пули ва иккита полиэтилен пакетдаги озиқ-овқат маҳсулотлардан ўз истеъмоли йўлида фойдаланган.
Жиноят ишлари бўйича Ғиждувон туман суди Ш.Х.ни Жиноят кодексининг 166-моддаси 2-қисми «а» банди (ҳаёт ва соғлиқ учун хавфли бўлмаган зўрлик ишлатиб ёхуд шундай зўрлик ишлатиш билан қўрқитиб талончилик қилиш) билан айбли деб топиб, унга уч йил муддатга озодликни чеклаш жазоси тайинлаган.
Изоҳ (0)