Навоий вилояти Кармана туманида спиртли ичимлик таъсирида бўлган ака-ука ресторанда жанжал кўтариб, официантлардан бирининг бўйнига ўроқ санчиб олди. Бу ҳақда вилояти ИИБ ахборот хизмати хабар берди.
Маълум қилинишича, 10 май куни тахминан тунги соат 02:30 ларда Д.К. исмли фуқаро маст ҳолда акаси Б.С. билан бирга жамиятда юриш-туриш қоидаларини қасддан менсимасдан «Табассум» номли ресторан иш юритувчиси ва официанти билан жанжаллашган. Жанжал вақтида Б.С. ўроқни ресторан официанти О.Д.нинг танасига бир маротаба санчиб олган.
Кармана тумани Тиббиёт бирлашмасининг 10 майдаги хулосасига кўра, жабрланувчига бўйин соҳаси орқали юзаси чуқур кесилган жароҳат ташхиси қўйилган.
Ҳолат юзасидан ака-укага нисбатан Жиноят кодексининг 277-модда (безорилик) 2-қисми «б,в» бандлари билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Аввалроқ Навоийда рашк сабаб бир эркак ва аёл пичоқлангани, Самарқандда собиқ турмуш ўртоғининг уйига фарзандини кўришга келган эркак қайнонасини ўроқ билан уриб ўлдиргани, Навоийда поччаси билан ичкиликбозлик қилган ука опасини пичоқлаб ўлдириб қўйгани тўғрисида хабар берилганди.
Изоҳ (0)