Тошкент шаҳар Халқ таълими бош бошқармаси бўлим бошлиғи Фароғат Аҳмаджонова бош бошқарма тасарруфидаги мактабларнинг 11-синф битирувчилари бандлиги бўйича маълумот берди.
Маълум қилинишича, 2021 йилда Тошкент шаҳрида 29 мингдан ортиқ ўқувчи 11-синфни тамомлайди.
Мактабни тамомлаётган ўқувчиларнинг келгуси режалари бўйича ўтказилган мулоқот натижасига кўра, 24 мингдан ортиқ ўқувчи (85 фоиздан ортиқ) олий таълим муассасаларига кириш истагини билдирган бўлса, 1700 дан ортиқ ўқувчи касб-ҳунар коллежлари ва техникумларда ўқимоқчилигини маълум қилган. 2000 дан ортиқ ўқувчи мактабни тамомлагач, ишлаш ниятида эканлигини билдирган.
Бундан ташқари, 400 дан ортиқ битирувчи хориж ОТМларида ўқиш ва меҳнат фаолиятини давом эттириш ниятлари борлигини, 274 нафари ҳарбий хизматга бориш истагини айтган.
«Таълимга тортилмайдиган 57 нафар ногиронлиги бор битирувчи билан тарғибот-ташвиқот ишлари олиб борилмоқда. Уларни уй шароитида бўлса-да бандлигини таъминлаш ишлари ҳамкор ташкилотлар билан амалга оширилмоқда», — дейди Фароғат Аҳмаджонова.
2019/2020-ўқув йилида 11-синфни тамомлаган битирувчиларнинг 36 фоизи ОТМларга ўқишга кирган. Ушбу кўрсаткич 2021 йилда юқори бўлиши кутилмоқда. Чунки ҳозирда муддатидан олдин 70 нафардан ортиқ ўқувчи аллақачон хориж ОТМларга ўқишга киришга муваффақ бўлган.
Мавзуга доир: Шерзод Шерматов ўқувчилари ОТМга кира олмаган мактаблар сони 2020 йилда 3 баробарга камайганини маълум қилди
Изоҳ (0)