Toshkent shahar Xalq ta’limi bosh boshqarmasi bo‘lim boshlig‘i Farog‘at Ahmadjonova bosh boshqarma tasarrufidagi maktablarning 11-sinf bitiruvchilari bandligi bo‘yicha ma’lumot berdi.
Ma’lum qilinishicha, 2021-yilda Toshkent shahrida 29 mingdan ortiq o‘quvchi 11-sinfni tamomlaydi.
Maktabni tamomlayotgan o‘quvchilarning kelgusi rejalari bo‘yicha o‘tkazilgan muloqot natijasiga ko‘ra, 24 mingdan ortiq o‘quvchi (85 foizdan ortiq) oliy ta’lim muassasalariga kirish istagini bildirgan bo‘lsa, 1700 dan ortiq o‘quvchi kasb-hunar kollejlari va texnikumlarda o‘qimoqchiligini ma’lum qilgan. 2000 dan ortiq o‘quvchi maktabni tamomlagach, ishlash niyatida ekanligini bildirgan.
Bundan tashqari, 400 dan ortiq bitiruvchi xorij OTMlarida o‘qish va mehnat faoliyatini davom ettirish niyatlari borligini, 274 nafari harbiy xizmatga borish istagini aytgan.
“Ta’limga tortilmaydigan 57 nafar nogironligi bor bitiruvchi bilan targ‘ibot-tashviqot ishlari olib borilmoqda. Ularni uy sharoitida bo‘lsa-da bandligini ta’minlash ishlari hamkor tashkilotlar bilan amalga oshirilmoqda”, — deydi Farog‘at Ahmadjonova.
2019/2020-o‘quv yilida 11-sinfni tamomlagan bitiruvchilarning 36 foizi OTMlarga o‘qishga kirgan. Ushbu ko‘rsatkich 2021-yilda yuqori bo‘lishi kutilmoqda. Chunki hozirda muddatidan oldin 70 nafardan ortiq o‘quvchi allaqachon xorij OTMlarga o‘qishga kirishga muvaffaq bo‘lgan.
Mavzuga doir: Sherzod Shermatov o‘quvchilari OTMga kira olmagan maktablar soni 2020-yilda 3 barobarga kamayganini ma’lum qildi
Izoh (0)