Наманган вилоятида дори воситаларини ноқонуний равишда сақлаётган ва мамлакат ҳудудига олиб кираётган шахслар аниқланди, дея хабар бермоқда «Yuz.uz».
Давлат хавфсизлик хизматининг Наманган вилояти бошқармаси ходимлари томонидан вилоят божхона бошқармаси билан ҳамкорликда ўтказилган тезкор тадбир давомида Наманган шаҳрида яшовчи 1986 йилда туғилган Ғ.Д. ва 1962 йилда туғилган Х.О.нинг яшаш хонадонлари кўздан кечирилди.
Натижада улардан ҳеч қандай тегишли ҳужжатлари бўлмаган 51 турдаги умумий қиймати 1 миллиард 300 миллион сўмлик дори воситалари процессуал тарзда расмийлаштирилиб олинди.
Аниқланишича, ушбу дори воситалари қўшни Қирғизистондан вилоят ҳудудига Янгиқўрғон туманидаги айланма йўллар орқали ноқонуний равишда олиб ўтилган.
Шунингдек, Чуст тумани «Юқори Ғова» маҳалласида яшовчи 1988 йилда туғилган Х.Ж. 67 турдаги умумий қиймати 700 миллион сўмлик дори воситаларини автомашинада Қўқон шаҳрига олиб кетаётган вақтида Поп тумани ҳудудида тўхтатилиб, ундан дори воситалари тегишли тартибда олиб қўйилди.
У мазкур дори воситаларини Қирғизистоннинг Ола-буқа туманида яшовчи, 1976 йилда туғилган шахсдан олиб, айланма йўллар орқали Ўзбекистон ҳудудига ўтказган.
Ҳозирда ҳар икки ҳолат юзасидан суриштирув ҳаракатлари олиб борилмоқда.
Бундан аввал Фарғонада 34 миллион сўмлик кимёвий дори воситаларининг ноқонуний савдосига чек қўйилгани, Марғилонда 32 яшар аёл томорқасида кўкнори етиштираётгани аниқлангани ҳамда Сурхондарёда 500 грамм гиёҳванд моддани организмида олиб киришга уринган шахс қўлга олингани ҳақида хабар берилганди.
Изоҳ (0)